Այսօր միջազգային դիտորդները հրավիրած ասուլիսում ՏԻՄ ընտրությունները գնահատեցին միջազգային չափանիշներին համապատասխան, նորմալ, ժողովրդավարական, զուսպ եւ այլն:
Ասուլիսից հետո դիտորդներից մեկն Aravot.am-ի հետ զրույցում իր մտահոգությունները ներկայացրեց մեր երկրի վերաբերյալ: Նրա խոսքերով՝ «Եթե մենք լեզու չենք հասկանում, դա դեռ չի նշանակում, թե մենք ոչինչ չենք տեսնում, հասկանում»: Նա խնդրեց իր անունը չհրապարակել, միայն նշել, թե ինչն է իրենց դժգոհության պատճառ հանդիսացել. «Եվրոպայի խորհրդի կոնգրեսում պետք է ընդդիմությունը ներկա լինի անպայման պատվիրակության մեջ՝ յուրաքանչյուր նիստին: Հայաստանն ուղարկում է միայն պրոկառավարական պատգամավորներ: Մյուս անգամ մենք շատ կոշտ ենք լինելու, որ անպայման ընդդիմադիր ուժերը ներկայացված լինեն»:
Մեր դիտարկմանը, որ ասուլիսում նշվեց, թե ընդդիմությունը թեկնածուներ չունի, ֆինանսական միջոցներ չունի, դրա համար ակտիվորեն չի մասնակցում ՏԻՄ ընտրություններին, մինչդեռ իրականում թեկնածուներ, կադրեր կան, բայց ընդդիմությունը դա համարում է անիմաստ ռեսուրսների վատնում, որովհետեւ գործի են դրվում իշխանական ողջ լծակները եւ ամեն ինչ կանխորոշված է՝ դիտորդը պատասխանեց. «Ընդհանրապես մարդու մակարդակով է ընտրությունների ժողովրդավարությունը որոշվում: Ֆրանսիայում, Իտալիայում, ամենուրեք ամենաժողովրդականություն վայելող ֆունկցիան գյուղապետը, քաղաքապետն ունեն: Իսկ Հայաստանում հակառակն է: Չեն հասկանում դա»:
Կարդացեք նաև
Իսկ թե ինչու են դժգոհություններ ունենալու պարագայում դիտորդները նորմալ գնահատական տալիս ընտրություններին՝ նա պատասխանեց, որ անցյալի համեմատ՝ առաջընթաց կա:
Հռիփսիմե ՋԵԲԵՋՅԱՆ
