«Եվրոպական միություն / «Եվրոպա Նոստրա» 2012» մրցանակաբաշխության շրջանակում ՀՀ Արագածոտնի մարզի Չքնաղ համայնքի պատվավոր անդամ Գառնիկ Հովսեփյանն արժանացել է միջազգային ժյուրիի հատուկ գնահատականին: Ինչպես Aravot.am-ին տեղեկացրին ԻԿՕՄՕՍ/Հայաստանի գրասենյակից, Հովսեփյանը միջազգային ժյուրիի հատուկ գնահատականին և «Անհատի կողմից օրինակելի ներդրում մշակութային ժառանգության բնագավառում» անվանակարգում հավաստագրին է արժանացել: Ժյուրիի նախագահ Ալեքսանդր Ֆյուրստ ցու Սայն-Վիտգեյնշտեյն-Սայնն էլ նրան շնորհակալություն է հայտնել` Եվրոպայի ընդհանուր հարստություն համարվող մշակութային ժառանգության պահպանությանն ուղղված երկարամյա ու նշանակալից ջանքերի համար:
«Անհատի կամ կազմակերպության կողմից օրինակելի ներդրում» անվանակարգում նման գնահատականի են արժանացել նաև Բելգիան, Ֆինլանդիան, Իտալիան, Լեհաստանը, Շվեդիան և Իսպանիան: Հայաստանի Հանրապետությունն առաջին անգամ է մասնակցում:
2012թ. սեպտեմբերի 30-ին, Հայաստանում Եվրոպական ժառանգության օրերի շրջանակում, Չքնաղի մշակույթի տանը տեղի կունենա Գառնիկ Հովսեփյանին պատվոգրի հանձնման արարողություն եւ միջոցառում: Իսկ ցուցադրվելիք տեսաշարը, որը կրում է «Պահպանություն հանուն ապագայի» խորագիրը, թույլ կտա պատկերացում կազմել այն մասին, թե ինչու է Չքնաղի Սբ. Ստեփանոս եկեղեցական համալիրի վերականգնման նախագիծն արժանացել հատուկ գնահատականի:
Կարդացեք նաև
Ի դեպ, Գառնիկ Հովսեփյանի որդիները ՀՀ գլխավոր դատախազ Աղվան Հովսեփյանը եւ ՀՀԿ խմբակցության պատգամավոր Ռուբեն Հովսեփյանն են:
Գոհար ՀԱԿՈԲՅԱՆ
