«Դը Ռեքորդս» թերթը պատմում է, որ Նյու Յորքի Թրոյ քաղաքի և տեղի հայ համայնքի միջև լարվածություն էր ծագել հայոց ցեղասպանության հուշահամալիրի տեղադրման վայրի հետ կապված:
Հուշարձանի գաղափարը ծագել էր «Վարդանի ասպետներ և դստրեր» հայկական կազմակերպության մոտ: 2005թ. նրանք ստեղծել էին Հայոց ցեղասպանության հուշահամալիրի միությունը, որն աշխատում էր հուշարձանը տեղադրել քաղաքի մերձակայքում: Կարճ ժամանակ անց քաղաքի խորհուրդը հուշարձանը տեղադրելու իր համաձայնությունը տվեց, սակայն չնշեց տեղադրման վայրը, մինչդեռ համայնքը հույս ուներ այն տեղադրել Ռիվերֆրոնտ զբոսայգում: Այն ժամանակվա քաղաքապետ Հարի Թութունջյանը հորդորեց սպասել, որպեսզի հուշարձանը ներառեն այգին վերանորոգելու 1.75 միլիոնանոց պետական դրամաշնորհային ծրագրի մեջ: Այս որոշումն էլ ստեղծեց լարվածություն հայ համայնքի և քաղաքի միջև, համայնքն արդեն զննում էր այլ զբոսայգիներ հուշարձանը տեղադրելու համար:
Անցած շաբաթ քաղաքապետ Լու Ռոսամիլիան կապնվել է հայ համայնքի հետ և վստահեցրել, որ հուշարձանը կտեղադրվի քաղաքի կենտրոնում գտնվող Ռիվերֆրոնտ զբոսայգում:
