Սեպտեմբերի 24-ից բոլոր նրանք, ովքեր անհամբերությամբ սպասում են Հայաստան-Իտալիա հանդիպմանը, կարող են արդեն ձեռք բերել այդքան սպասված խաղի տոմսերը: Հանդիպումը կայանալու է «Հրազդան» մարզադաշտում, սկսվելու է 20:00-ին: Տոմսերի արժեքն է 3000-10000 դրամ:
Տոմսերի գներն արդեն երկրպագուների շրջանում դժգոհելու առիթ են դարձել: Նրանցից շատերն են նշում, որ այդպիսի բարձր գների դեպքում «Հրազդան» մարզադաշտը կիսադատարկ է լինելու: Երկրպագուները սկսել են իրենց բողոքն արտահայտել ֆեյսբուքում. «Խի 32 000 դրամ աշխատավարձ ստացողը մարդ չի: ինքն էլ ա ուզում հավաքականի խաղը լավ տեղից նայի», «Եթե 54 000-ի փոխարեն տեսնենք 25000-ից ոչ ավել հանդիսական, դա կնշանակի տոմսերի գները 2 անգամ թանկ են, ինչը տեսանք Թուրքիայի հետ խաղում: Կարելի է հետեւություններ անել», «Ոնց հասկացա` Հայաստան-Իտալիա խաղը կիսադատարկ «Հրազդանում» ա անցնելու»: Ալեքսանդր Սարգսյանը իր դժգոհությունն է հայտնել`գրելով. «Գին սահմանելուց պետք է հաշվի առնել մի քանի ֆակտորներ`երկրի սոցիալական վիճակը, հավաքականի ցուցադրած ցածրորակ ֆուտբոլը և ընդհանրապես սերվիսը: Նման գներ սահմանվում են այն դեպքում, երբ լրացուցիչ ծառայություններ են ներառված, օրինակ`խմիչքի ցածր գները, մարզադաշտում առկա ատրիբուտները երկրպագուի համար»:
Մերին ուսանողուհի է: Իր խոսքով` այդ խաղին երկար է սպասել: Որոշել է`մարզադաշտ պետք է գնա քույրերի և եղբայրների հետ`մոտ 7 հոգով. «Ես որոշել էի արևելյան տրիբունայի տոմս առնել, սակայն, երբ այսօր իմացա գները, փոշմանեցի, երևի հյուսիսային տրիբունայում գնեմ: Զարմանում եմ` «Հանրապետական» մարզադաշտում արևելյան տրիբունայի տոմսերը 5000 դրամ էին: Գոնե «Հրազդան» մարզադաշտի համար գները փոքր ինչ էժան լինեին, որ այդ մեծ ստադիոնը դատարկ չլիներ խաղի օրը: Ճիշտ է, 3000 դրամը թանկ չէ, բայց պետք է ամբողջ մարզադաշտում երկրպագուներ լինեն, ոչ թե միայն յարուսում: Ի վերջո, ո՞վ է որոշում տոմսի գները և ի՞նչ են հաշվի առնում որոշելիս»:
