Շիրակի մարզի Վարդաղբյուր գյուղում 1 ձայնի տարբերությամբ գյուղապետ է ընտրվել Սարգիս Բալոյանը` առաջ անցնելով 37 ձայն հավաքած 26-ամյա իր մրցակցից ` Արծրուն Թոսունյանից: Այստեղ գյուղապետի աշխատանքն այնքան անհրապուրիչ է, որ նախկին գյուղապետ Հրաչիկ Բալոյանը, ցանկություն չի հայտնել մասնակցել ընտրապայքարին:Այսպիսով նա իր տեղը զիջեց հորեղբոր թոռանը` Սարգիս Բալոյանին, ով ժամանակին նույնպես գյուղապետ է եղել:Նշենք, որ սա փոքր գյուղ է`91 բնակիչ ունեցող, որը աստիճանաբար դատարկվում է:Գյուղը բյուջե չունի, գյուղապետարանի շենքը գտնվում է 9 մետրանոց քրքրված վագոն-տնակում, դպրոցն էլ տարրական է, աշակերտներ համարյա չկան, նրանք սովորում են ընդամենը 3 տարի` կրթությունը շարունակելով հարևան Մուսայելյանում: Այսինքն ստացվում է , որ նման պայմաններում գյուղապետի աշխատանքը դառնում է անիմաստ. նա այդքան ֆինանսական միջոցներ չունի գյուղի խնդիրները լուծելու: Շիրակի մարզպետարանի տարածքային վարչության տեղական ինքնակառավարման եւ համայնքային ծառայության հարցերի բաժնի պետ Ռուբեն Հարությունյանի տեղեկացնելով, սա միակ գյուղը չէ, որտեղ գյուղապետ են ընտրվում ձայների նվազագույն տարբերությամբ : Օրինակ` այդպիսիներից են նաև Փանիկը և Կապսը, որտեղ գյուղապետերը հաղթել են 7 ձայնի տարբերությամբ: Իսկ Հովինում գյուղապետը հաղթել է 9 ձայնի, Գուսաննայում` 12 ձայնի, Հոռոմում էլ `14 ձայնի տարբերությամբ: Հիշեցնենք, որ մեկնաբանելով Փանիկի դեպքը` ընդամենը 7 ձայնով պարտված թեկնածու Վարդան Մակեյանի եղբայրը` «Ժողովրդավարական հայրենիք » կուսակցության նախագահ Պետրոս Մակեյանը, մեզ հետ զրույցում հայտարարել էր, որ մեղավորը Արթիկի ոստիկանապետն է: Ըստ կուսակցության առաջնորդի, «ՕԵԿ-ի քվոտայով ընտրված ոստիկանապետ» Տիգրան Պետրոսյանը կազմակերպել էր ՕԵԿ-ական Հրաչիկ Սալնազարյանի հաղթանակը:
Նունե ԱՐԵՎՇԱՏՅԱՆ
