Ըստ Արտակ Զեյնալյանի՝ Սերժ Սարգսյանը փորձում է պատասխանատվությունն իր վրայից գցել
«Եթե կա խնդիր, ապա դա ողջ կառավարության լուծելիք խնդիրն է: Կառավարությունից որեւէ մեկը, առանձին վերցրած, չի կարող լուծել այդ խնդիրները: Իսկ գործադիր իշխանության ղեկավարը հենց ինքն է՝ նախագահը: Ինքն իրենից պետք է դժգոհի»,- «Առավոտի» հետ զրույցում անդրադառնալով նախորդ շաբաթ օրը ՀՀ կառավարությունում կայացած խորհրդակցությանը, որի ժամանակ նախագահ Սերժ Սարգսյանը խիստ քննադատության ենթարկեց կառավարության անդամներին, որոշներին՝ անգամ անվանական, ասաց «Հանրապետություն» կուսակցության քաղխորհրդի անդամ Արտակ Զեյնալյանը: Մեր զրուցակցի կարծիքով. «Վեց ամիսը մեկ չեն գալիս-ասում՝ ի՞նչ ես արել, այ տղա, այսինչի կամ այնինչի համար: Անընդհատ հետեւում են, ղեկավարում են, կառավարում: Եվ կառավարման արդյունքը ստանալու համար ամենակարեւոր գործոնը քաղաքական լեգիտիմությունն է»: «Առավոտի» դիտարկմանը՝ եթե հիմա գոնե տեսականորեն ընդունենք, որ նախագահ Սարգսյանն անկեղծ էր իր նախատինքներում, դիտողություններում եւ պատրաստվում է հետեւողական լինել, միեւնույն է՝ այդ դեպքում է՞լ չի հաջողելու, քանի որ լեգիտիմ ընտրված նախագահ չէ, Արտակ Զեյնալյանը հակադարձեց. «Ինքը չի կարող տարանջատվել գործադիր իշխանությունից: Կառավարությունից տարանջատվել հնարավոր չէ, եւ կառավարության մեջ հնարավոր չէ տարանջատել այսինչ կամ այնինչ նախարարին: Կառավարությունը կամ հաջողել է, կամ չի հաջողել»: Օրինակ բերելով առողջապահական ոլորտը եւ նախագահի անդրադարձն այդ ոլորտին ու նրա պատասխանատուին՝ Արտակ Զեյնալյանը հայտարարում է. «Ոլորտի հաջողությունը նախարարությունից կախված է ընդամենը 15 տոկոսով: Ոչ ավելի: Ամբողջ աշխարհում է դա ընդունված եւ հասկանալի: Մնացածը՝ բոլորի համատեղ եւ ներդաշնակ գործունեությամբ են հասնում արդյունքի: Չես կարող այդ նախարարին առանձնացնել, փնովել, թե 100 կամ 20 տոկոս արդյունք չես տալիս: Առկա խնդիրների համար ողջ կառավարությունն է պատասխանատու՝ իր ղեկավարով՝ հանրապետության նախագահով»:
Նկատեցինք, որ սա նախագահ Սարգսյանի առաջին սուր քննադատությունը չէր գործադիրի հասցեին հնչեցված: Երեկ «Ժառանգություն» խմբակցության ղեկավար Ռուբեն Հակոբյանը վկայակոչեց դեռ 2010 թվականի դեկտեմբերին Սերժ Սարգսյանի ունեցած առավել սուր եւ քննադատական ելույթը, որին այդպես էլ քայլեր չհետեւեցին: Պարոն Զեյնալյանին խնդրեցինք զուգահեռներ անցկացնել՝ սա է՞լ, այսպես ասած, ցուցադրությունների ոլորտից էր, թե՞ հնարավոր են նաեւ գործողություններ: «Ավելի շատ դրան է նման, քան հետեւանք առաջացնող որեւէ գործողության»,- եղավ պատասխանը:
Կարդացեք նաև
Պարոն Զեյնալյանից նաեւ հետաքրքրվեցինք՝ «Հանրապետություն» կուսակցությունն արդեն կողմնորոշվե՞լ է առաջիկա նախագահական ընտրություններում իր մասնակցության ձեւերի մասով, ո՞ր քաղաքական ուժերի հետ է նախընտրելի համագործակցությունը, կամ գուցե արդեն կա՞ն քաղաքական շփումներ: Վերջինս պատասխանեց. «Այդ հարցի պատասխանը մենք կորոշենք՝ երբ եւ ինչպես հնչեցնել: Հիմա այդ հարցին պատասխանելը նպատակահարմար չենք գտնում»: Դիտարկմանը՝ նպատակահարմար չեք գտնում, որովհետեւ պատասխա՞ն չկա, թե՞ այլ խնդիրներ կան, Արտակ Զեյնալյանը կարճ պատասխանեց. «Նպատակահարմար չենք գտնում, եւ դրանում որեւէ այլ բան չկա»:
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
