Վրաստանի նախագահի կարգադրության համաձայն՝ Թբիլիսիի N 8 Գլդանի բանտում այս գիշեր բանտարկյալների հարազատները հանդիպել են պատիժը կրող իրենց մտերիմներին: Այդ իրադարձությունը, սակայն, անցյալ գիշեր միակ ուշագրավ ակցիան չի եղել Վրաստանի մայրաքաղաքում: Ինչպես հաղորդում է trend.az կայքը. «Ամբողջ գիշերվա ընթացքում Թբիլիսիում շարունակվել են ուսանողական բողոքի ցույցերը, որոնց օժանդակել է «Վրացական երազանք» ընդդիմադիր դաշինքը:
Ի դեպ, Գլդանյան բանտի դեպքերի կապակցությամբ ժողովրդին հատուկ դիմում է հղել Թբիլիսիի քաղաքապետ Գիգի ՈՒգուլավան: «Գրուզիա օնլայն» կայքի հավաստմամբ նա նշել է, որ. «Չնայած մի շարք կարևոր և հիմնարար բարեփոխումներին, մենք ինչ որ բան բաց ենք թողել: Ինչ-որ մի կարևոր բանի չենք կարողացել հատկացնել անհրաժեշտ ուշադրություն»:
Թբիլիսիի քաղաքապետը «Միացյալ ազգային շարժման» անունից ներողություն է խնդրել այն մարդկանցից, ովքեր ենթարկվել են ծաղրանքի ու անմարդկային վերաբերմունքի: Նա, միաժամանակ, դիմել է իրավապահ մարմիններին՝ խնդրելով լինել անկողմնակալ քննությունների անցկացման ժամանակ:
