Այսօր հրավիրած ասուլիսում «Ժառանգություն» կուսակցության առաջնորդ Րաֆֆի Հովհաննիսյանը հայտարարեց, որ այնուամենայնիվ, ինքն է առաջադրվում նախագահի թեկնածու. «Ամեն ինչ անելու եմ իմ թեկնածության առաջադրման, եթե պետք լինի՝ բացառման համար: Ես հաջորդ 100 օրը կնվիրեմ հինավուրց Հայաստանի ժամանակակից պետության նախագահության՝ քաղաքացիական համոզիչ թեկնածության ձեւավորմանը: Նա, ով ի վերջո կդառնա 2013-ի արշալույսին նախատեսված հավաքական պայքարի կրողը՝ ես թե մեկ ուրիշը, պետք է կյանքի կոչի մի քանի հիմնական պահանջներ: Մեր օղակված հայրենիքը, որտեղ ես չեմ ծնվել, բայց ուր 20 տարուց ավելի է՝ վերադարձել եմ, պետք է անցկացնի 1991-ի հետխորհրդային անկախությունից ի վեր իր առաջին ժողովրդավարական ընտրությունները: Հայաստանը կարիք ունի նոր դե յուրե նախագահի: Վերջապես ազգին կպատկանի մի Սահմանադրություն, որ այլեւս չի լինի լոկ փաստաթղթային»:
Լրագրողները ճշտեցին՝ հիմա Դուք թեկնածությո՞ւն եք դնում, թե՞ ման եք գալիս թեկնածու՝ նա պատասխանեց. «Այսօրվա ելույթի սկիզբը խոսում էր թեկնածու դառնալու, թեկնածության մասին ելույթ էր, որը անհրաժեշտ է համարում, որ Հայաստանի Հանրապետությունը քաղաքացիական, քաղաքական աննախադեպ ուժի միջոցով ունենա վերջապես ժողովրդին պատկանող նախագահ»:
Հռիփսիմե ՋԵԲԵՋՅԱՆ
