Այսօր, ժամը 10.00-ից 11.00-ն ՀՀ ոստիկանության Երեւանի քննչական վարչության ավագ քննիչ, ոստիկանության մայոր Վ. Ջիվանյանի մոտ հարցաքննության ենթարկվեց որպես վկա հրավիրված՝ «Առավոտ» թերթի լրագրող, իրավական էջի պատասխանատու Ռուզան Մինասյանը։
Քննիչը տեղեկացրել էր, որ լրագրողը հրավիրվում է այս տարվա հուլիսի 26-ին Կենտրոն եւ Նորք-Մարաշ վարչական շրջանների ընդհանուր իրավասության դատարանում դատական նիստի ժամանակ ինքնավնասած եւ դատախազ Ստեփան Հովակիմյանի նկատմամբ կատարված բռնության փաստի առթիվ Վ. Քերոբյանի դեմ հարուցված քրեական գործով։
Քիչ առաջ Ռուզան Մինասյանը տեղեկացրեց, որ գրել է բացատրություն, ներկայացրել այդ օրը Aravot.am-ում զետեղված 3 հրապարակումները եւ դատարանի դահլիճից արված 6 լուսանկար։ Քննիչին մասնավորապես հետաքրքրել է դատական նիստի ընթացքը, ամբաստանյալի կողմից դատախազին հարվածելու, ինչպես նաեւ դատախազի՝ ամբաստանյալին հակադարձելու պահը։
