ՄԱԿ-ի գլխավոր քարտուղար Բան Կի Մունը
ՄԱԿ-ի գլխավոր քարտուղար Բան Կի Մունը Մեդիամաքս-ին պատմել է Գլխավոր Ասամբլեայի 67-րդ նստաշրջանից իր ակնկալիքների մասին:
Զարգացող ու անցումային տնտեսությամբ երկրներից Նյու-Յորք ժամանած լրագրողների հետ կայացած հանդիպման ընթացքում, պատասխանելով Մեդիամաքս–ի թղթակցի հարցին, Բան Կի Մունն ասել է.
«ՄԱԿ-ի Գլխավոր Ասամբլեայի 67-րդ նստաշրջանն անց է կացվում ճգնաժամային մի այնպիսի ժամանակաշրջանում, որին մենք երբեւէ ականատես չենք եղել: Ճգնաժամերը շարունակվում են եւ առնչվում են բոլոր երկրներին: Մենք կրկին բախվում ենք անհանդուրժողականության, տնտեսական ճգնաժամի, տարածաշրջանային հիմնախնդիրներին: Այդ ամենը հաշվի առնելով, Գլխավոր Ասամբլեայի այս նստաշրջանից հետո ակնկալում եմ տեսնել հավաքական ջանքեր եւ գործողություններ անդամ երկրների առաջնորդների կողմից՝ ուղղված այս խնդիրների լուծմանը»:
Անդրադառնալով Սիրիայում տիրող իրավիճակին՝ ՄԱԿ-ի գլխավոր քարտուղարն ասել է, որ անպատասխանատու է պարզապես «կողքից դիտել», թե ինչ է կատարվում այդ երկրում: Միաժամանակ, նա նկատել է, որ ՄԱԿ-ի Անվտանգության խորհուրդը դեռեւս ունակ չէ հստակ գործողություններ ձեռնարկել, քանի որ Խորհրդի մշտական անդամները դեռեւս չեն կարողանում ընդհանուր դիրքորոշման հանգել սիրիական ճգնաժամի շուրջ:
«Ուստի տվյալ պահին մենք չենք կարող ակնկալել ավելին»,- Մեդիամաքս-ին ասել է Բան Կի Մունը:
