Այսօր Վանաձորում գործող հասարակական կազմակերպություններն ու նախաձեռնող խմբերը հնարավորություն էին ստացել բաց երկնքի տակ ներկայացնելու իրենց տարիների աշխատանքը:
Արդեն երկրորդ տարին է «ՀԿ Կենտրոն» քաղաքացիական հասարակության զարգացման հասարակական կազմակերպության նախաձեռնությամբ վանաձորցիները եւս անմասն չեն մնում քաղաքացիական հասարակության օրը նշելու հնարավորությունից:
«Սա լավ առիթ է նաեւ խրախուսելու նոր նախաձեռնություններին, բացի դրանից լավ առիթ է քաղաքում ակտիվություն մտցնելու տեսանկյունից»,-ասում է Վանաձորում Ջինիշյան հիշատակի հիմնադրամի «Քաղաքացիական երկխոսություն եւ գործնական քայլեր ծրագրի» օգնական Լիլիթ Սինդոյանը:
«ՀԿ կենտրոն» քաղաքացիական հասարակության զարգացման ՀԿ աշխատակից Նորա Մինասյանն էլ կարծում է, որ ակտիվ պետք է լինեն ոչ միայն հասարակական կազմակերպությունները. երկրի զարգացումը անհատից էլ է կախված: «Մենք ցանկանում ենք սրանով խթանել կազմակերպությունների դերը ընդհանրապես մեր հասարակության մեջ, ցույց տալ որ միայն ՀԿ-ները չեն, որ կազմում են հասարակության մաս, այլ ցանկացած անհատ, ցանկացած երիտասարդ, ծերունի, բոլորը ինչ-որ կերպ իր մասն ունեն հասարակության մեջ»-ասում է Ն. Մինասյանը: Նա նշում է, որ թեեւ վերջին տարիներին Վանաձորում քաղաքացիական հասարակության զարգացման միտումներն ավելացել են, այնուամենայնիվ, այդ գործընթացը դեռ աճման փուլում է: «Քաղաքացիական հասարակության զարգացման միտումներն ավելացել են. ակտիվություն է նկատվում թե գենդերային, թե բնապահպանության հարցերում, եւ մեծամասամբ ակտիվիստները հենց ՀԿ-ների ներկայացուցիչներ են: Սակայն, քաղաքացիական հասարակությունը, որպես այդպիսին, իհարկե, դեռ շատ աճելու տեղեր ունի, այն կա, բայց աճման փուլում է»,-Aravot.am-ի հետ զրույցում նշում է Նորա Մինասյանը:
ՀԿ-ների ցուցահանդեսից զատ` ներկաները ձեւավորեցին «Քաղաքացիական հասարակությանը ցանկանում եմ… » պաստառը, ինչպես նաեւ նրանցից երեքը հաղթող ճանաչվեցին «Ես Վանաձորցի եմ» խորագրով ֆոտոմրցույթում:
Անուշ ԲՈՒԼՂԱԴԱՐՅԱՆ
