Երեկ ՄԱԿ-ի Գլխավոր ասամբլեան Նյու Յորքում բացեց իր 67-րդ նստաշրջանը: Մեկ շաբաթվա աշխատանքներից հետո երկուշաբթի՝ սեպտեմբերի 24-ին նախատեսվում է ընդգրկուն և ներկայանալի կազմով քննարկում միջազգային իրավունքի և օրենքի գերակայության հարցով: Քննարկմանը ներկա կգտնվեն ինչպես ՄԱԿ-ի անդամ երկրների, այնպես էլ քաղաքացիական հասարակության ներկայացուցիչներ: Քննարկումների ընթացքում կմշակվեն մի շարք մեխանիզմներ՝ օրենքի կարգավորումը տարբեր երկրներում ուժեղացնելու և բարելավելու ուղղությամբ:
Իսկ արդեն սեպտեմբերի 25-ին տեղի կունենա տարեկան ամփոփիչ բանավեճ, որի ընթացքում Գլխավոր ասամբլեան կլսի անդամ պետությունների ղեկավարների և կառավարությունների հայտարարությունները:
Aravot.am-ը հետևելու է ՄԱԿ-ի Գլխավոր ասամբլեայի բոլոր քննարկումներին և այդ ընթացքում հնչած ելույթներին: Այժմ ներկայացնենք, թե հատկապես ինչ հարցեր կքննարկի Գլխավոր ասամբլեան սեպտեմբերի 24-ին:
Ըստ Գլխավոր ասամբլեայի A/RES/66/102 որոշման՝ նախատեսվում է մեկօրյա պլենար քննարկում: ՄԱԿ-ի Գլխավոր ասամբլեայի նախագահը և այլ բարձրաստիճան պաշտոնյաներ պլենար նիստի ընթացքում հանդես կգան իրենց ելույթներով՝ կապված օրենքի գերակայության և կարգավորման հարցերի շուրջ:
Կարդացեք նաև
Նշենք նաև, որ մինչ պլենար քննարկումը ձևավորվել է տարբեր ոչ կառավարական կազմակերպությունների ներկայացուցիչներից կազմված մարմին, որը որպես խորհրդատվական մարմին հանդես կգա քննարկումների ընթացքում:
Քանի որ ՄԱԿ-ի Գլխավոր ասամբլեան 67-րդ նստաշրջանի ընթացքում հատուկ ուշադրություն է դարձնելու օրենքի գերակայության ու կարգավորման, միջազգային իրավունքի հարցերին, ապա սեպտեմբերի 24-ին կայանալիք պլենար քննարկումը ոչ միայն հարթակ է լինելու տարբեր երկրների ներկայացուցիչների համար՝ բարձրաձայնել իրենց երկրում այս ոլորտներում գոյություն ունեցող խնդիրները, այլև պլենար քննարկումից հետո կկազմվի մի փաստաթուղթ Գլխավոր ասամբլեայի ղեկավարի և անդամ երկրների ներկայացուցիչների մասնակցությամբ: Փաստաթուղթը պարունակելու է հստակ առաջարկներ ու գործողություններ:
Տեղեկացնենք նաև, որ ՄԱԿ-ում օրենքի կարգավորման և միջազգային իրավունքի հարցերը որոշել են քննարկել ոչ միայն փողկապավոր դիվանագետների ու քաղաքական գործիչների ներկայությամբ, այլև մինչև հուլիսի 9-ը քաղաքացիական հասարակության բոլոր ներկայացուցիչները հնարավորություն են ունեցել անդամագրվել և մասնակցության հայտ ստանալ ՄԱԿ-ի Գլխավոր ասամբլեայում օրենքի կարգավորման և միջազգային իրավունքին նվիրված քննարկմանը մասնակցելու համար:
Տաթև ՀԱՐՈՒԹՅՈՒՆՅԱՆ
