Սեպտեմբերի 27-ին «Արամ Խաչատրյան» համերգասրահում «Երեւանյան հեռանկարներ» փառատոնի շրջանակներում կկայանա աշխարհահռչակ դաշնակահար Եվգենի Կիսինի համերգը: Ինչպես Aravot.am-ին տեղեկացրեց «Երեւանյան հեռանկարներ» փառատոնի հիմնադիր նախագահ, կոմպոզիտոր Ստեփան Ռոստոմյանը, Կիսինին Երեւան հրավիրելու բանակցությունները տեւել են շուրջ 8 տարի:
Պարոն Ռոստոմյանը, խոսելով իրենց փառատոնի մասին, հպարտությամբ նշեց, որ այն աշխարհում առաջատարներից է, որովհետեւ մշտապես հյուրընկալում է առաջին դասի արվեստագետների:
Ինչ վերաբերում է Եվգենի Կիսինին, «Երեւանյան հեռանկարների» նախագահի խոսքով, նա ամեն փառատոնի հրավեր չի ընդունում. «Գնում է միայն իրեն արժանի տեղեր»:
Կարդացեք նաև
Ռոստոմյանի հավաստմամբ, մեր օրերի լավագույն դաշնակահարը համաձայնել է ելույթ ունենալ Երեւանում, քանի որ իրենից առաջ «Երեւանյան հեռանկարները» հյուրընկալել է աշխարհի ամենահեղինակավոր այլ մենակատարների և նվագախմբերի, որոնց թվում են Պլասիդո Դոմինգոն, Վալերի Գերգիևը՝ Մարիինյան թատրոնի նվագախմբի հետ, Քշիշտոֆ Պենդերեցկին, Բորիս Բերեզովսկին, Յուրի Բաշմետը, Գիդոն Կրեմերը, Դավիդ Գերինգասը, Լոնդոնի թագավորական ֆիլհարմոնիկ նվագախումբը, Գուլբենկյան նվագախումբը եւ այլն:
Մանրամասները՝ տպագիր «Առավոտի» առաջիկա համարներից մեկում:
Գոհար ՀԱԿՈԲՅԱՆ
