Կենտրոն եւ Նորք-Մարաշ վարչական շրջանների ընդհանուր իրավասության դատարանում, դատավոր Արշակ Վարդանյանի նախագահությամբ, շարունակվեց հայր եւ որդի Վաղարշակ եւ Հակոբ Աբաջյանների նկատմամբ հարուցված քրեական գործով դատական հերթական նիստը:
Նրանք մեղադրվում են «Մենք մերոնցով» թերթի գլխավոր խմբագիր Ալվարդ Աբրահամյանի եւ նրա ամուսնու՝ Յուրա Սրապյանի սպանության համար:
Այս դատական նիստերը ընթանում են միշտ լարված, թե տուժող կողմը, թե վկաները, թե ամբաստանյալի հարազատները բավական զգայուն են, երբ տեսնում են դատական նիստերի դահլիճում որեւէ լրատվամիջոցի:
Կարդացեք նաև
Այսօր, մինչ դատը կսկսվեր, երբ նիստերի դահլիճ բերվեցին ամբաստանյալները, սպանվածի տարեց մայրը, հարազատները փորձեցին մոտենալ ամբաստանյալներին: Դատական կարգադրիչները փորձեցին հանգստացնել նրանց, իսկ երբ տեսան, որ անհուսալի է վիճակը դառնում, դուրս հանեցին Յուրայի մորը:
Այդ ընթացքում, երբ փորձում էինք լուսանկարել, հիմա էլ ամբաստանյալների հարազատներից մի կին խանգարեց՝ ասելով, թե իրավունք չունենք լուսանկարել, անգամ դիմեց իր պաշտպաններին՝ Նարինե եւ Ռուբեն Ռշտունիներին: Ինչեէ, մի կադր հաջողվեց: Հետագայում այդ կինը փորձեց տուժող Արմենուհի Ստեփանյանին ստախոսության մեջ մեղադրել, ու հեռացվեց դահլիճից առհասարակ:
Մինչ տուժող Արմենուհի Ստեփանյանի ցուցմունքը, հրապարակվեցին նրա նախաքննական ցուցմունքները:
Փաստորեն, լրագրողը 5 անգամ ցուցմունք է տվել, ինչը, ըստ ամբաստանյալների պաշտպանների, էական հակասություններ ունի դատաքննության ժամանակ տրված ցուցմունքների հետ:
Տուժող Արմենուհի Ստեփանյանն ասել էր, որ 12 000 դոլար գումար է տվել սպանված Ալվարդ Աբրահամյանին: Վերջինը խոստացել էր իր ծանոթ, ամբաստանյալ, «Խաչակիրներ» հասարակական կազմակերպության նախագահ Վաղարշակ Աբաջյանի միջոցով լուծել իր բնակարանի հարցը, քանի որ մինչ օրս բնակվում է վարձով եւ տուն չունի:
Տուժողը մեկ ասել էր, թե 8000 է տվել, հետո՝ 2000, ապա 2000-ն էլ տվել էր Վաղարշակին, սակայն այն մինչեւ վերջ չկարողացավ հիմնավորել:
Նա ասաց, որ վերջին անգամ Ալվարդի հետ հանդիպել է անցյալ տարվա օգոստոսի 31-ին, ժ.18-ի սահմաններում:
Ուշագրավ էր, որ տուժողն ասաց, թե սեպտեմբերի 1-ին իրենց խմբագիր Ալվարդ Աբրահամյանի աշխատասենյակում (Արշակունյաց 2, 13-րդ հարկ) տեսել էր Վաղարշակին, հետո զարմացել էր ու հասկացել, որ նա եկել էր հետքերը մաքրելու:
Նա ասաց, որ Ալվարդի աշխատասենյակի բանալին ուներ լրագրող Սուրեն Գեղամյանը եւ Ալվարդը, ուրիշ ոչ ոք:
Ի դեպ, ըստ պաշտոնական վարկածի, օգոստոսի 31-ին, ժամը 15-ի սահմաններում, Վաղարշակ և Հակոբ Աբաջյանները Յուրիկ Սրապյանի վստահությունը չարաշահելու միջոցով, խաբեությամբ` Սևանա լճից խեցգետնի որս և առևտուր կազմակերպելու պատրվակով, Երևանի Այգեստան 10-րդ փողոցի թիվ 22 հասցեում գտնվող, իրենց պատկանող առանձնատան բակից «Մերսեդես» մակնիշի 11 ՍՕ 138 համարանիշի ավտոմեքենայով Յուրիկ Սրապյանին առևանգել և տեղափոխել են Գեղարքունիքի մարզի Բերդկունք գյուղի` Սևանա լճի հարևանությամբ գտնվող կիսակառույց շինության տարածք: Նշված շինությունում Հակոբ և Վաղարշակ Աբաջյանները հարվածելու և ձեռքերով խեղդելու եղանակով դիտավորությամբ, ապօրինաբար կյանքից զրկել` սպանել են Յուրիկ Սրապյանին, որից հետո Հակոբ Աբաջյանը, ստուգելով և համոզվելով, որ Յուրիկ Սրապյանն սպանված է, Վաղարշակ Աբաջյանի հետ Յուրիկի դիակից հանել են հագուստները, դին գցել նշված շինության մոտ գտնվող փոսի մեջ և քարերով ծածկել, իսկ հագուստները նետել են Գավառ-Երևան ավտոմայրուղու տարբեր հատվածներում:
Ռուզան ՄԻՆԱՍՅԱՆ
