Այսօր «Էրեբունի Պլազայում» տեղի ունեցավ «Տաշիր» բարեգործական հիմնադրամի և ԱԺ պատգամավոր Կարեն Կարապետյանի գրասենյակի աջակցությամբ հրատարակված «Վահան Տերյան. Ընտիրը» ժողովածուի շնորհանդեսը:
Հազար օրինակով տպագրված գրքի օրինակների մի մասը կտրամադրվի Երեւանի եւ մարզային դպրոցներին, Արցախի գրադարաններին եւ բանասիրական ֆակուլտետներ ունեցող բուհերին:
Կարեն Կարապետյանի գրասենյակի ղեկավար Արտակ Ճաղարյանը ելույթի խոսքում ասաց, որ Տերյանի գործերը քիչ են հրատարակվել. «Նախաձեռնությունը նպատակ ունի լրացնել այդ բացը՝ ընթերցողի սեղանին դնելով մեր գրականության հսկաների ստեղծագործությունները: Կարապետյանները կարեւորում են համազգային արժեքների փոխանցումը սերունդներին եւ վերջիններիս դաստիարակումն այդ արժեքներով, այդ թվում՝ գրականության միջոցով: Կարեւոր է, որ հատկապես երիտասարդները ծանոթ լինեն մեր գրականության շքեղ ստեղծագործություններին»: Ճաղարյանը հավելեց, որ առաջիկայում նախատեսվում է տպագրել Տերյանի գործերի նոր ժողովածու:
Հայաստանի Գրողների միության նախագահ Լեւոն Անանյանն ասաց, որ Տերյանը մեր բացառիկ դասականներից է. «Նոր ժողովածուն լույս է տեսել առանց միջամտությունների եւ ընդգրկում է հրաշալի հատված Հրանտ Մաթեւոսյանից: Նա յուրահատուկ կերպով է վերլուծում Տերյանին, ով նոր մոտեցում մտցրեց գրականության եւ մշակույթի մեջ: Կուզենայի, որ մեր մյուս դասականների ստեղծագործությունները նույնպես դրվեն շրջանառության մեջ»:
Կարդացեք նաև
«Վահան Տերյան. Ընտիրը» ժողովածուի խմբագիր, Աժ պատգամավոր Տաճատ Վարդապետյանը աստվածային համարեց այն իրողությունը, որ հայ ժողովուրդն ունի Տերյանի պես բանաստեղծ. «Ժողովածուն մեծ համակրանքի արժանացավ: Հուլիսի նախավերջին կիրակի օրը այն հասել է Ջավախք: Ժողովածուն մատչելի է. ճիշտ է, տերյանագիտության մեծ հայտնագործություն չենք արել, բայց աստվածահաճո գործ է կատարվել»:
Վահան Տերյանի թոռը՝ Գրիգոր Էմին Տերյանը փաստեց, որ առանց միջամտությունների վերահրատարակվող ժողովածուները վկայում են Տերյանի ստեղծագործությունների արդիականության մասին. «Վերեւներից հրամայողներ չկան, քանի որ այդ գործերը ժողովրդի սերն են արտահայտում: Մեր գրքերը թանկ են վաճառվում, բայց արագ սպառվում են, քանի որ ժողովուրդն իսկապես սիրում է Վահան Տերյանին: Հույս ունեմ, որ Տերյանի ձեռագրերը նույնպես կհրատարակվեն, քանի որ առանց դրանց ամբողջական չեն ակադեմիական հրատարակությունները»:
Գրիգոր Էմին Տերյանի խոսքով՝ եթե քնելուց առաջ կարդանք Տերյան, մեր առողջությունը եւ լեզուն կլավանան. «Իսկ եթե քաղաքական գործիչները կարդան Տերյան, բարի մտքեր կունենան եւ կսիրեն մեր ժողովրդին»:
Լուիզա ՍՈՒՔԻԱՍՅԱՆ
