Աջափնյակ եւ Դավիթաշեն վարչական շրջանների ընդհանուր իրավասության դատարանում, դատավոր Վազգեն Ռշտունու նախագահությամբ, այսօր նշանակված ժամից 1 ժամ 15 րոպե ուշացումով սկսվեց խարդախության եւ վաշխառության գործով մեղադրվող Արտակ Մարտիրոսյանի, Ցոլակ Պետրոսյանի, Վարդան Օհանյանի եւ Դավիթ Երեմյանի դեմ հարուցված քրեական գործով դատական նիստը:
Հիշեցնենք, որ այս գործի վարույթն անջատվել է հայտնի «Նորաշենի գործից», երբ մարդիկ գումարներ տվեցին ինչ-որ անձանց ՝ նորակառույց շենքում բնակարաններ ստանալու ակնկալիքով:
Անջատված մասով կա մեկ հետախուզվող:
Ամբաստանյալ Վարդան Օհանյանը հրաժարվեց իր պաշտպանից՝ ՀՀ փաստաբանների պալատի անդամ Արայիկ Ալվանդյանից, ասելով, թե պաշտպանը շարունակ ծանրաբեռնված է, եւ չի կարողանում հասցնել:
ՀՀ գլխավոր դատախազության դատախազ, մեղադրող Հարություն Հարությունյանը չառարկեց, ասելով, որ պաշտպանից հրաժարումը ամբաստանյալի իրավունքն է, իսկ դատավորը հիշեցրեց, որ դա կարող է տեղի ունենալ պաշտպանի մասնակցությամբ:
Ամբաստանյալին տրվեց 2 րոպե դադար, նա հեռախոսով փորձեց կապվել իր պաշտպանի հետ, սակայն պաշտպանն անհասանելի էր:
Դատական նիստը նշանակվեց սեպտեմբերի 29-ին:
Ռուզան ՄԻՆԱՍՅԱՆ
