Գերմանիայի օտարախոս համայնքների միությունը, որն ունի 35 անդամ համայնքներ, այդ թվում նաեւ Բեռլինի հայկական համայնքը, օրերս նշեց կազմավորման 30-ամյակը: Ավանդաբար տոնը նշվում է քաղաքի Ալեքսանդրպլաց կոչվող հրապարակին կից այգում, որին այս տարի մասնակցում էին բոլոր համայնքներից՝ շուրջ 170 տաղավար:
«Այսչափ մեծ մասշտաբով այս տոնը երրորդ անգամն է, որ տոնում ենք, դա որոշում է խորհուրդը: Տոնում ենք, որ ասենք Բեռլինին՝ տեսեք այստեղ այսքան օտարախոս քրիստոնյաներ կան, շատ եկեղեցիներ կան, տարբեր երկրներից: Ներկայացնում ենք մեր մշակույթը, սովորույթները, խոհանոցը եւ այլն»,- պատմում է խորհրդի անդամ, հայազգի Սոնա Եպպերը:
Միջոցառումը կարեւորում են թե հայկական կողմի ներկայացուցիչները եւ թե մնացած բոլոր համայնքների. բոլորը նույն խնդիրն ունեն՝ ինտեգրվելու, ներկայանալու եւ ճանաչվելու:
Կարդացեք նաև
Խորհուրդը կազմակերպել էր նաեւ բացօթյա պատարագ, որի ավարտից անմիջապես հետո կենդանի համերգով իր բացառիկ մասնակցությունն ունեցավ տոնին փանկ-ռոք երաժիշտ, երգերի հեղինակ, անվանի երգչուհի Նինա Հագենը: Բեռլինի հայկական համայնքի նախագահ Պետրոս Դիքիջյանի գնահատանքն ու ակնկալիքը այս միջոցառումից մեկն է՝ ամրապնդվող կամ նոր փոխհարաբերություններ Գերմանիայի մյուս համայնքների հետ:
ԳԱՅԱՆԵ ԱՌԱՔԵԼՅԱՆ
Բեռլին
«Առավոտ» օրաթերթ
