Տարածաշրջանային հետազոտությունների կենտրոնի տնօրեն Ռիչարդ Կիրակոսյանն այսօր լրագրողների հետ հանդիպման ժամանակ խոսելով տարածաշրջանային զարգացումներից՝ ներկայացրեց մի հետազոտություն, որը վերաբերում էր հակաամերիկյան տրամադրություններին, եւ որը տարածվել է ամբողջ աշխարհում:
«Վերջերս հակաամերիկյան ալիք է բարձրացել մի ֆիլմի շուրջ, որը նպատակ ուներ վիրավորելու իսլամը: Ցածր բյուջե ունեցող «Մուսուլմանների անմեղությունը» վերնագրով ֆիլմը անգամ չի ցուցադրվել ամերիկյան կինոսրահներում, այն թողարկվել է ամիսներ առաջ, բայց դրա դեմ ցույցեր են տեղի ունենում այս պահին. պատճառն այն է, որ ֆիլմի արաբական տարբերակը ներբեռնվել է «Youtube-ում»: Ֆիլմը ֆինանսավորել են ծայրահեղական քրիստոնյաները, ստեղծվել է եգիպտացի մի հանցագործ քրիստոնյայի կողմից, որն այժմ ոստիկանության կողմից հետախուզման մեջ է գտնվում: Ֆիլմում նկարահանվող դերասանները խաբվել են, քանի որ նկարահանումներից հետո դերասանների երկխոսությունը փոխվել է: Ֆիլմի հետ կապված արձագանքը այն էր, ինչը պատճառ հանդիսացավ ամբողջ վրդովմունքի, երբ Լիբիայում ԱՄՆ դեսպանն ու դեսպանատան երեք աշխատակիցներ սպանվեցին: Դեսպանի հետ կապված ամենահետաքրքրական փաստն այն էր, որ նա այն մարդկանցից էր, ով պայքարում էր Քադաֆիի դեմ»,- ասաց Կիրակոսյանը՝ հավելելով, որ ֆիլմը ոչ մի կապ չունի ԱՄՆ կառավարության անդամների հետ: Ըստ բանախոսի՝ Երեւանում գտնվողների համար կարեւոր փաստ է, որ երեկ Բաքվում ԱՄՆ դեսպանատան դիմաց ցույց է տեղի ունեցել, ինչի արդյունքում ձերբակալվել է 20 ադրբեջանցի: «Սա վերջին այն իրադարձությունն է Ադրբեջանում, որտեղ Ալ Քաիդան գործում է Ադրբեջանի ներսում: Ահաբեկչական պլանավորման կենտրոնում գտնվում էին իսրայելական եւ ամերիկյան դեսպանատները: Նշեմ, որ կան մի քանի պատճառներ, որոնք փաստում են, թե ինչու էին այս զարգացումները կանխատեսելի. սա արաբական գարուն է, որ անցնում է նոր ժամանակահատվածի»,-ավելացրեց Կիրակոսյանը:
Ռիչարդ Կիրակոսյանը համոզված է՝ հակաամերիկյան դժգոհությունների ալիքը ժամանակավոր է, բայց դեռ հետ կվերադառնա: Հակաամերիկյան տրամադրություններն էլ ոչ թե Օբամայի քաղաքականության, այլ Բուշի քաղաքականության արդյունք են:
Կարդացեք նաև
Եվա ՀԱԿՈԲՅԱՆ
