Լուսանկարը՝ Արման Վեզիրյանի
«Սերժ Սարգսյանը մեր խեղճ, միամիտ ժողովրդին փորձում է ապացուցել, որ ինքը անմեղ գառնուկ է, եւ իր նախարարներն են մեղավոր, որ երկրում անարդարություն է, կոռուպցիա է: Ինքը հենց նոր է այդ մասին իմացել՝ նախագահական ընտրությունների շեմին»,- նախագահ Սերժ Սարգսյանի հրավիրած խորհրդակցությանն այսպիսի գնահատական տվեց ՀԱԿ անդամ Գայանե Առուստամյանը՝ Aravot.am-ի հետ զրույցում. «Դա ընդամենը տպավորություն ստեղծելու համար է արվում, որովհետեւ մեր ժողովուրդն իսկապես ազդվում է նման շոուներից, եւ կարող է այսպես ասած՝ «այդ կուտը ուտել»: Բայց Սերժ Սարգսյանը մոռանում է, որ այդ նույն ժողովուրդը վաղուց արդեն հիմար չէ, եւ շատ լավ հասկանում է, որ այս կոռուպցիայի, անարդարությունների գլխավոր գերագույն հրամանատարը հենց ինքը Սերժ Սարգսյանն է»:
Գայանե Առուստամյանը վստահ է, որ եթե նախագահական ընտրություններում Սերժ Սարգսյանը հաղթի, այդ նույն մարդիկ, որոնք թույլ են տվել այդ ապօրինությունները, շարունակելու են ծառայել նրան եւ շարունակելու են մնալ նրա կողքին:
Սերժ Սարգսյանը խորհրդակցության ժամանակ հորդորել էր, որ ԱԱԾ- ն եւ դատախազությունը լրջորեն զբաղվեն Վերահսկիչ պալատի հայտնաբերած չարաշահումներով եւ պատժեն մեղավորներին. «Գլխից պետք է բռնենք «մեծերին»: Ըստ Գայանե Առուստամյանի, հենց գլուխն ինքն է. «Սերժ Սարգսյանը հենց ինքն է այդ ձկան գլուխը, որը հոտում է: ԱԱԾ-ն շատ վաղուց պետք է զբաղվեր այդ հարցերով: Բայց ԱԱԾ-ն իր անմիջական առաքելությունը թողած՝ քանի տարի է արդեն զբաղվում է Սերժ Սարգսյանի իշխանությունը պահպանելու գործով: Զբաղվում է Սերժ Սարգսյանին ընդդիմացողներին ճնշելու, նրանց հալածելու գործերով: Այնպես որ, այդ նույն ԱԱԾ-ն Սերժ Սարգսյանի ավազակապետության հենասյունն է: Սա սովորական նախընտրական շոու է, պարզապես Սերժ Սարգսյանը, լինելով անտաղանդ մեկը, շատ վատ է կատարում այդ դերակատարությունը: Ինքը նույնիսկ վատ դերասան է»:
Հռիփսիմե ՋԵԲԵՋՅԱՆ
