Սեպտեմբերի 24-ին արդեն 6-րդ անգամ կմեկնարկի դասական երաժշտության «Վերադարձի փառատոնը» եւ կձգվի մինչեւ հոկտեմբերի 24-ը:
Ինչպես Aravot.am-ի հետ զրույցում հայտնեցին փառատոնի հիմնադիրներ Մարիամ Շահինյանն ու Գարիկ Նազարյանը, երաժշտական այս բացառիկ իրադարձությունը հայրենիք վերադարձի յուրօրինակ կոչ է այլ երկրներում ստեղծագործող հայազգի երաժիշտներին:
«Իբրեւ երաժիշտ նախանձախնդրորեն վերաբերվելով հարցին, որոշեցինք թեկուզ ժամանակավոր՝ փառատոնի շրջանակներում վերադարձնել տաղանդավոր մեր երաժիշտներին ու ներկայացնել հայ ունկնդրին»,-նշեց տիկին Շահինյանը:
Կարդացեք նաև
Մեր զրուցակիցները հիմնադրել են նաեւ «Ազգային պատկերասրահ» փառատոնը, որի շրջանակներում 2008-ին հանդես եկած «Ալիաջ» գերմանական կվինտետը ցնցել էր հայ հանդիսատեսին:
Մարիամ Շահինյանը Aravot.am-ին հայտնեց, որ սիրով կրկին կհրավիրեին ճանաչված կվինտետին, սակայն վերջինիս հայազգի երաժիշտներից մեկը՝ սաքսոֆոնահար Կորյուն Ասատրյանը, բանակի խնդիր ունի:
«Տաղանդավոր երաժիշտը, որն իր շուրջն է համախմբել 4 այլ անվանի այլազգի երաժիշտների, այսօր շրջագայում է աշխարհով մեկ, համերգներով շլացնում ունկնդրին, չի կարող գալ Հայաստան համերգների, թեեւ մեծ ցանկություն ու ծրագրեր ունի: Ուզում եմ խնդրել, որ մեր կառավարությունը նման երաժիշտների համար մի լուծում գտնի, ինչպես դա արվեց Սերգեյ Խաչատրյանի, Հրաչյա Ավանեսովի պարագայում: Ի դեպ, Հրաչյայի հարցը հենց մենք բարձրացրինք, եւ նա հնարավորություն ունեցավ ներկա գտնվել «Վերադարձի փառատոնին»,- ասաց Մարիամ Շահինյանը: Մանրամասները՝ տպագիր «Առավոտի» առաջիկա համարներից մեկում:
Գոհար ՀԱԿՈԲՅԱՆ
