Նոր տեսահոլովակից մինչև Անի Քրիստիի եւ «Մեծ Հայքի» Նարեկի ակտիվությունը ֆեյսբուքում

Օրեր առաջ երգչուհի Անի Քրիստին իր ֆեյսբուքյան էջում գրել էր. «Արդեն զգում եմ, որ Երեւանս կարոտել եմ, երեւի շուտով կլինեմ իմ սիրած, հարազատ քաղաքում»: Bravo.am-ն էլ փորձել է ճշտել, թե երբ է երգչուհին պատրաստվում գալ Հայաստան. «Դեռ հստակ չգիտեմ, բայց քանի որ անկանխատեսելի բնավորություն ունեմ, միգուցե մի օր պարզապես գնեմ տոմսերն ու գամ իմ հարազատ քաղաք», -ասել է նա:

Մինչ Անի Քրիստին կարոտում է իր հայրենիքն ու նախատեսում է գալ, ֆրանսահայ երգիչ Եսայի Ալթունյանն արդեն Հայաստանում է: Սա նրա երրորդ այցելությունն է հայրենիք: Սակայն ինչպես նախորդ անգամ, այս անգամ ևս երգիչը նոր տեսահոլովակով է եկել: Տեսահոլովակի նկարահանումները տեղի են ունեցել Ֆրանսիայում:

Վերջին մի քանի ամիսների ընթացքում հատկապես ֆեյսբուքում ակտիվ են նաև հանրային դեմքերը: Մի քանի օր առաջ էլ «Մեծ Հայքի» Նարեկն է արտահայտվել իր անձնական էջում, տեղեկացնելով, որ անորոշ ժամանակով հեռանում է ռեփից. «Բոլոր իմ երկրպագուներին ուզում եմ տեղյակ պահել, որ ես անորոշ ժամանակով դուրս եմ գալիս ռեփից: Բոլորիդ շատ սիրում եմ ու գնահատում: Շարունակեք լսել Մեծ Հայք»:

Նոր տեսահոլովակ է նկարահանել երգչուհի Վարսան: Սա նրա թվով երկրորդ տեսահոլովակն է: «Realised» անգլիալեզու երգի երաժշտության հեղինակը կոնսերվատորիայի դասախոս, կոմպոզիտոր Նարինե Զարիֆյանն է, խոսքերը գրել է Աննա Ամիրյանը: «Նրանց հետ համագործակցել եմ նաեւ առաջին տեսահոլովակիս երգի համար: Այն սոուլ ոճում է, թե՛ երաժշտությունը, թե՛ բառերը հոգեհարազատ են ինձ ու իմ կյանքի հետ կապ ունեն: Մոտավորապես այսպես են հնչում խոսքերը` ատամներդ սեղմիր, որ չզգաս, թե ինչ ցավ է, որովհետեւ ես քեզ շպրտում ու ազատում եմ: Հերիք է լաց լինես, աղաչես, ես ազատում եմ քեզ, որովհետեւ դու ինձ համար այլեւս հետաքրքիր չես: Երգը վայրի, ուժեղ մարդու մասին է, այդ թվում` իմ: Կարելի է ասել, ազատելուց հետո հիմա սիրտս ազատ է»,-Bravo.am-ի հետ զրույցում ասել է Վարսան:

Տեսահոլովակների թիվն օրեցօր ավելանում է, իսկ Statoz.com կայքը դրանց հետևելով պարբերաբար հրապարակում է Youtube-ում տեղադրված տեսահոլովակների վիճակագրությունն` ըստ երկրների: Այսպիսով, ըստ կայքի՝ Հայաստանյան տեսահոլովակների դիտումների պատկերը հետևյալն է՝

Միհրան Ծառուկյանի և Լիլիթ Հովհաննիսյանի «Ինչո՞ւ եմ քեզ սիրում» երգի տեսահոլովակ տասներորդն է՝ 1,711,636 դիտումով:

Թեև «Блатной удар» -ի  «Доля воровская» երգն արդեն հեռացվել է Youtube-ից, բայց ժամանակին այն գրանցել է 1,788,711 դիտում և աղյուսակում շարունակում է մնալ հայաստանյան ամենադիտված տեսահոլովակների ցանկում:

Ութերորդը Տիգրան Ասատրյանի «Հայի սիրուն աչքեր» կատարումն է՝ 1,797,498 դիտումով:

Սիրուշոյի «Erotas»-ը 7-րդն է՝ 1,880,796  դիտումով:

Թաթա Սիմոնյանի «Տեսել եմ» երգը գրանցած է եղել 1,943,780 դիտում և եղել է 6-րդը, սակայն այն տեղադրված է եղել անհայտ օգտատիրոջ կողմից և հեռացվել է «Թաթա փրոդաքշն»-ի բողոքով:

Սիրուշոյի «Քելե քելե»-ն հատել է 2 մլն-ի սահմանը և 5-րդն է՝ 2,020,537 դիտումով:

Statoz.com կայքի վիճակագրության տվյալները ներկայացրել էր yes.am-ը:

Տիգրանուհի Թասլակյան