Անդրադառնալով Սերժ Սարգսյանի՝ ՏԻՄ ընտրություններից հետո Գյումրիում մթնոլորտի փոփոխության սպասելիքներին՝ նորընտիր ավագանու անդամ, ՀՀԿ-ական Հրայր Կարապետյանն ընդգծում է, որ Գյումրիում բարոյահոգեբանական մթնոլորտի փոփոխությունը կախված է ոչ միայն նորընտիր քաղաքապետից, այլեւ յուրաքանչյուր գյումրեցուց: Իսկ «Ասպարեզ» ժուռնալիստների ակումբի խորհրդի նախագահ, ավագանու անդամ Լեւոն Բարսեղյանն էլ ընդգծում է, որ եթե Սերժ Սարգսյանը ցանկանում էր Գյումրիում փոխել մթնոլորտը, ապա նա դրա համար բազմաթիվ այլ գործիքներ ուներ եւ չպետք է սպասեր ՏԻՄ ընտրություններին: Ստորեւ ներկայացնում ենք հատվածներ Գյումրու նորընտիր ավագանու անդամների «Դեմ առ դեմ» բանավեճից :
Լեւոն Բարսեղյան- Հիմա ստացվում է, որ Սերժ Սարգսյանը կրավորական կեցվածք էր ընդունել. սպասենք, ընտրությունները գան՝ մեկին թողնենք առաջադրվի, մյուսին՝ ոչ, որպեսզի մթնոլորտ փոխվի: Սա արդարացի չէ, եւ ահագին մեծ սեթեւեթանքի կշիռ ունի իր մեջ: Քաղաքական գործիչները, իմ կարծիքով, նման բան իրենց չպետք է թույլ տան: Ինչ վերաբերում է ԲՀԿ-ՀՀԿ հարաբերություններին, ապա ԲՀԿ-ն չի հայտարարել, որ ինքը անտագոնիստ կամ հակառակորդ է ՀՀԿ-ին: ԲՀԿ-ի դիրքը, մանկական խաղերից քաղված բառով, միջուկի դիրք է: Ծանր կացության ժամանակ երբ կամենա՝ ԲՀԿ-ն կկարողանա որոշակի բաներ փորձել թելադրել: Օրինակ՝ այս դեպքում, երբ Ծառուկյանը համաձայնեց, որ Բալասանյանը լինի քաղաքապետացու եւ քաղաքապետ, բնականաբար՝ հաշվի նստեց Սերժ Սարգսյանի կամքի եւ ցանկության հետ: Ճիշտ է, կուսակցության ղեկավար էր, որը կարծես թե ահագին ձայներ ուներ, բայց զորավորը Բաղրամյան 26-ն էր, եւ ոչ ոք չի կարող այդ ատյանի հետ ճակատ ճակատի տալ եւ ասել՝ չէ, մեր կուսակցությունից ասենք թե՝ Մարտուն Գրիգորյանը պիտի լինի թեկնածուն: Այնպես որ, այս երկու կուսակցությունների միջեւ կոնֆլիկտ չկա, եւ ինչ էլ որ երեւում է՝ այդ ամենը երբեմն ձեւական է, երբեմն էլ երրորդ-չորրորդ կարգի խնդիրներ են:
«Առավոտ»- Այս ՏԻՄ ընտրություններում ԲՀԿ-ՀՀԿ համագործակցություն նկատվեց նաեւ այլ համայնքներում, մասնավորապես՝ Արթիկում եւ Սիսիանում: Արդյոք այս իրողությունը չի՞ հաստատում ԲՀԿ անդամ Վարդան Օսկանյանի այն պնդումը, թե այս ՏԻՄ ընտրությունները սկիզբն էին իշխանության միակուսակցական համակարգի տարրալուծման:
Կարդացեք նաև
Հրայր Կարապետյան- Ես ինքս եւ մեր բոլոր կուսակցական ընկերները նման բան չենք նկատում: Այդ պարագայում կարելի էր ընդունել, որ եթե ԲՀԿ-ականները կամ նրանց հարող ավագանու թեկնածուները չեն ընտրվել, ուրեմն դա նրանց պարտությո՞ւնն է: Եվ պետք չէ դիտարկել, որ եթե ԲՀԿ անդամ թեկնածուն ընտրվեց Գյումրու քաղաքապետ, դա պարտություն էր Հանրապետական կուսակցության համար: Ես նաեւ ուզում եմ նշել, որ այս ՏԻՄ ընտրությունները էապես տարբերվում էին թե՛ խորհրդարանական, թե՛ նախագահական նախորդ ընտրություններից: Եթե նախորդ ընտրություններում գումար բաժանելը կարող էր դեր խաղալ, ապա այս ընտրություններում եթե խաղում էլ էր, ապա շատ քիչ: Բայց որ այդ ամենը մասսայական չի եղել՝ դա փաստ է:
«Առավոտ»- Պարոն Բարսեղյան, դա Ձեզ համար է՞լ է փաստ:
Լ. Բ.- Դա պարոն Կարապետյանի կարծիքն է:
Հ. Կ.- Բնականաբար՝ սա իմ կարծիքն է: Բացի այդ, չմոռանանք, որ Գյումրին սպեցիֆիկ է նրանով, որ այստեղ բարեկամա-ընկերական հարաբերությունները շատ ավելի զորավոր են: Այստեղ այդքան չեն կարեւորվում մարդու արժանիքներն ու կրթական ցենզը, որքան հարազատներին ու ընկերներին չնեղացնելը: Բայց այս անգամ նույնիսկ այդ թաղային հեղինակությունների գործոնը եւ նաեւ գումարը դեր չունեցող, ելքի վրա չազդող էր:
Լ. Բ.- Դերի չափը դժվար է որոշել, դրա համար լուրջ հետազոտություններ են պետք, որոնք ոչ արվել են, ոչ էլ կարվեն Հայաստանում: Ես ունեմ տեղեկություններ, որ փողի վրա թեկնածուի համարն են գրել-տվել, երկու, երեք, հինգ հազար դրամ, կիլոյով միս, գազի զեղչի կտրոններ են բաժանել: Նմանատիպ բազմաթիվ ահազանգեր ունենք: Եվ դրանց ազդեցության չափը դժվար է որոշել: Ես ներկայացնեմ որոշ թվեր. եթե բաժանենք ավագանու ստացած միջին քվեն տեղամասերի վրա, ապա ստացվում է 10-15 քվե: Եվ ահա երբ նայում ենք այդ տողը, տեսնում ենք, որ ավագանու թեկնածուն մի տեղ 7 քվե է ստացել, ապա՝ 23, 6, 15 ու մեկ էլ՝ 324 քվե: Այս ֆանտոմային քվեները խոսում են կա՛մ բացարձակ թաղային գործոնի ազդեցության, կա՛մ կաշառքի մասին: Եվ ահա այսպիսի փաստերի վերլուծությամբ չեմ հիշում, որ որեւէ մեկը Հայաստանում զբաղված լինի: «Արմատ» ակումբը կարծեմ ԱԺ 15 տարի առաջվա ընտրությունների հիման վրա վերլուծել էր, բայց ավագանու մասով ոչ ոք չի խորացել:
Հ. Կ.- Ես նշեցի, որ այդ ամենը շատ քիչ է դեր խաղացել, եւ պնդում եմ. եթե շատ լուրջ դեր խաղացած լիներ, ապա պարոն Բարսեղյանի եւ ինձ նման մարդիկ չէին հայտնվի ավագանու կազմում եւ այդպիսի ձայներ չէին հավաքի:
«Առավոտ»- Լեւոն Բարսեղյանը՝ գուցե, նա ընդդիմադիր է, սակայն Դուք իշխող ՀՀԿ անդամ եք:
Հ. Կ.- Ես Ձեզ վստահեցնում եմ, որ միայն ՀՀԿ ներկայացուցիչ լինելը բավարար չէր ավագանու կազմում ընդգրկվելու համար, առավել եւս, որ կային 2-3 ՀՀԿ-ական թեկնածուներ, որոնք ավագանու կազմ չընդգրկվեցին:
«Առավոտ»- Ձեր գնահատմամբ՝ նորընտիր ավագանին կկարողանա՞ քաղաքապետի կամակատար մարմնից վերածվել գործուն ինստիտուտի:
Լ. Բ.- Այս ավագանու կազմում որեւէ մեկ թիմ մեծամասնություն չունի: Սա կարեւոր է: Բացի այդ, մի քանի բաներ կան, որոնք կմեծացնեն ավագանու դերը: Ավագանու նիստերն այլեւս չեն լինի հանրությունից գաղտնի, քանի որ եթե դրանց մասին իրազեկվեմ ես, ապա ավտոմատ բոլորը կիրազեկվեն: Բոլոր նիստերը ուղիղ եթեր են հեռարձակվելու: Ապահովվելու է հասարակության մասնակցությունը՝ ֆիզիկական եւ միջնորդավորված: Նախկինը երբեք չի լինի, այլ բան, որ առաջընթացը մենք կարող ենք ապահովել չափավոր եւ ոչ թե ցանկալի: Բայց ավելի որակյալ, գործունակ, թափանցիկ եւ հաշվետու ավագանի ունենալու շանսերը կան: Նոր քաղաքապետը չունի այն արմատների համակարգը՝ վարչական ռեսուրսներ, կապեր եւ այլն, որոնք ուներ գործողը: Պետք է օգնել եւ հարկ եղած դեպքում նաեւ խանգարել, որպեսզի չլինի նախորդի վատ ավանդույթների շարունակությունը, իսկ լավ ավանդույթների դեպքում պետք է օգնել, որ դրանք մնան:
Բանավեճը վարեց ԱՐԵՎԻԿ ՍԱՀԱԿՅԱՆԸ
Նախագիծն իրականացվում է Բաց հասարակության հիմնադրամներ -Հայաստանի ֆինանսական օժանդակությամբ:
Գյումրու նորընտիր ավագանու անդամների «Դեմ առ դեմ» բանավեճն ամբողջությամբ
