Ազգային անվտանգության խորհրդում նախորդ օրը քննարկվել են սեպտեմբերի 15-19-ը Հայաստանում անցկացվելիք Հավաքական անվտանգության պայմանագրի կազմակերպության զորավարժությունների կազմակերպման խնդիրները եւ մարդու իրավունքների պաշտպանության ազգային ռազմավարությունը: Այս մասին այսօր լրագրողների հետ հանդիպման ժամանակ ասաց Արթուր Բաղդասարյանը:
Ըստ նրա, առաջիկա զորավարժություններն ունեն քաղաքական նշանակություն, եւ մասնակցելու են մոտ 1700 զինծառայող ոչ միայն Հայաստանից , այլեւ ՀԱՊԿ անդամ բոլոր պետություններից, լինելու են նաեւ պաշտպանության նախարարության , ազգային անվտանգության խորհրդի, ոստիկանության եւ Արտակարգ իրավիճակների նախարարության ստորաբաժանումներից մասնակիցներ: Պարոն Բաղդասարյանի խոսքերով, զորավարժությունների ընթացքն ու արդյունքները վերլուծելու համար, կստեղծվի ազգային անվտանգության խորհրդի եւ պաշտպանության նախարարության համատեղ աշխատանքային խումբ: Նիստում բացի զորավարժությունների անցկացման հարցից, քննարկվել է նաեւ
Մարդու իրավունքների պաշտպանության ազգային ռազամավարությունը: Պարոն Բաղդասարյանը հիշեցրեց, որ Հայաստանը նման փաստաթուղթ ընդունելու միջազգային պարտավորություններ ունի: Նրա խոսքերով, այդ ռազմավարությունը պատասխանելու է միջազգային կազմակերպությունների այն զեկույցներին, որտեղ Հայաստանի մարդու իրավունքների պաշտպանության ոլորտում առկա հիմնախնդիրները, թերություններն ու անհրաժեշտ քայլերն են բարձրաձայնում:
Կարդացեք նաև
Նա ասաց, որ ռազմավարությունը 3 տարվա ընթացքում է կազմվել, աշխատանքներում ներգրավված են եղել ՄԱԿ-ի, ԵԱՀԿ-ի եւ ԵԽ-ի փորձագետները: Պարոն Բաղդասարյանի խոսքերով, ՄԻՊ ռազմավարության թիրախ են ընդունված կանայք, երեխաները, փախստականները, դատապարտյալները, բռնադատվածներն ու հաշմանդամները: Ռազմավարությունը երեք ուղղությամբ է աշխատելու` օրենսդրական բարեփոխումների իրականացում, ինստիտուցիոնալ բնույթի բարեփոխումների շրջանակում կստեղծվի միջգերատեսչական հանձնաժողով, որն իր ուշադրության կենտրոնում կպահի մարդու իրավունքների պաշտպանությունը: Երրորդ ուղղությունն էլ` իրավակիրառական պրակտիկան , կմատնանշի` ինչպես են պաշտպանվում մարդու իրավունքները Հայաստանում:
Պարոն Բաղդասարյանը, անդրադառնալով ադրբեջանա-հունգարական գործարքի վերաբերյալ երեկ ԵԽ ընդունած բանաձեւին , ասաց. «Ընդհանուր առմամբ, ընդունվել են 15 պաշտոնական հայտարարություններ այդ հայտնի պատմության հետ կապված, եւ բոլոր այդ հայտարարությունները բարձր ներկայացուցչական ատյանների ու բարձրաստիճան պաշտոնատար անձանց կողմից էին: Այն ինչ տեղի ունեցավ երեկ, եւս մեկ անգամ արձանագրեց, որ միջազգային հանրությունն անընդունելի է համարում, սա մեր համար շատ դրական փաստ է, աշխարհը կիսում է մեր մոտեցումները, որովհետեւ հանցագործությունն աննխադեպ է եւ նաեւ դրան հաջորդած գործընթացը եւս : Չափազանց կարեւոր է, որ միջազգային հեղինակավոր քաղաքական ատյանը միացյալ դիրքորոշում է որդեգրում այս երեւույթի հետ կապված … երեկ բազմաթիվ մտահոգություններ են հնչել, որ սա կարող է նախադեպ դառնալ տարբեր երկրներում:: Սա պատահական արձագանք չէ, կարծում եմ` այս գործընթացը կշարունակվի , տարբեր միջազգային խորհրդարանական կառույցներ դեռ այս հարցին անդրադառնալու են»:
Արփինե ՍԻՄՈՆՅԱՆ
