Եվրախորհրդարանի լիագումար նիստում այսօր քննարկվեց Ռամիլ Սաֆարովի գործը: Քննարկումն անցկացվում էր մարդու իրավունքների և ժողովրդավարության հարցերի վերաբերյալ քննարկման շրջանակներում: Տեղեկացնենք, որ խորհրդարանականների կողմից ներկայացված բանաձևը, որով դատապարտվում էր Սաֆարովի արտահանձնումն ու ներում շնորհելը, քվեարկության արդյունքում ընդունվեց: Բայց մինչ քվեարկությունը խորհրդարանականները հանդես եկան ելույթներով, որոնց մեծամասնությունը բավականին խիստ նոտաներ էին պարունակում:
Аravot.am-ը հետևեց քննարկման ընթացքին և պարզ դարձավ, որ բոլոր խորհրդարանականներն էլ դատապարտում էին Ադրբեջանի կողմից՝ Սաֆարովին ներում շնորհելու փաստը և հարցականի տակ դնում Ադրբեջանի՝ միջազգային իրավունքի և մարդու իրավունքների շրջանակներում պարտավորություների կատարումը:
Խորհրդարանականների մեծամասնությունը մտավախություն հայտնեց, որ Սաֆարովի դեպքը առանց այն էլ փխրուն իրավիճակում գտնվող տարածաշրջանի կայունությունը վտանգում է: Խորհրդարանականներից մեկը, անդրադառնալով Հունգարիայի պահվածքին, նշեց. «Մենք զարմացած ենք այն բանից, որ Հունգարիայի կառավարությունը բավականին անխոհեմ է գործել»:
Խորհրդարանական Գերոգի Շոփֆլին էլ նշեց, որ խնդիրն ունի իրավական և քաղաքական ուղղվածություն: Նա նաև նկատեց, որ Սաֆարովի խնդիրը սրում է սառեցված հակամարտությունը:
Կարդացեք նաև
Ուլրիխ Լունաչեքն էլ հայտարարեց. «Այս գործը վերաբերում է չլուծված հակամարտությանը, խաղաղ բանակցությունների վտանգմանը և կանխամտածված սպանությանն ու մարդասպանի հերոսացմանը»: Այնուհետև խորհրդարանականը հավելեց. «Հունգարիայի վարչապետը պիտի լսեր նաև ԱԳ նախարարին, ով զգուշացնում էր Սաֆարովի արտահանձնման հետևանքների մասին»:
Յարոսլավ Պաշկայի ելույթն էլ էր աչքի ընկնում սուր քննադատությամբ: Նա մասնավորապես ասաց. «Ալիևը հայտարարեց, որ Ադրբեջանի ցանկացած քաղաքացի, եթե որոշի մի հայ սպանել, հերոս կդառնա: Ալիևը այսպիսով գործեց որպես մաֆիայի պարագլուխ»:
Խորհրդարանական Վասիլի Անդրոուլան էլ ասաց. «Չեմ կարողանում հասկանալ, թե ինչու է դա տեղի ունեցել: Մենք պիտի մեր ձայնը բարձրացնենք, որ բարելավենք իրավիճակը: Հունգարիայի կառավարությունը հայտարարել է, որ նա Ադրբեջանի իշխանության հավաստիացումներն է ստացել, որ տվյալ անձնավորությունն իր պատիժը կրելու է Ադրբեջանում: Բայց դա տեղի չի ունեցել: Ուստի մենք պետք է օգնենք և նպաստենք, որպեսզի Ադրբեջանը կատարի իր միջազգային պարտավորությունները»:
Տաթև ՀԱՐՈւԹՅՈՒՆՅԱՆ
