Ազգային ժողովում «Բարգավաճ Հայաստան» խմբակցության անդամ, նախկին արտգործնախարար Վարդան Օսկանյանը կարծում է, որ Հայաստանի երկրորդ խոշոր քաղաքում` Գյումրիում, ԲՀԿ-ի հաղթանակը ցույց է տալիս, որ Հայաստանում առկա միակուսակցական համակարգը սկսել է զիջել իր դիրքերը:
Սեպտեմբերի 9-ին Գյումրիում տեղի ունեցած ՏԻՄ ընտրությունների արդյունքում, հիշեցնենք, քաղաքապետ ընտրվեց ԲՀԿ թեկնածու Սամվել Բալասանյանը, ում բացի ԲՀԿ-ից, աջակցում էր նաեւ իշխող Հանրապետականը:
«Մեր խնդիրների, չարիքների հիմնական պատճառը քաղաքական մենաշնորհն է: Բոլոր մյուս խնդիրները, որոնք առօրյա մեր կյանքի վրա զգում ենք, տնտեսական մենաշնորհը, կոռուպցիան, չարաշահումները, անարդարությունը, հետեւանք են այդ քաղաքական մենաշնորհի: Այս ՏԻՄ ընտրությունները գուցե սկիզբն էին իշխանության այդ տարաձուլման: Երկրորդ մեծ քաղաքում արդեն մի այլ կուսակցության ներկայացուցիչ է», – հինգշաբթի օրը «Ազատություն» ռադիոկայանին տված հարցազրույցում ասաց Վարդան Օսկանյանը:
Ըստ Օսկանյանի, Գյումրիում, որտեղ մայիսին կայացած խորհրդարանական ընտրությունների ժամանակ ԲՀԿ-ն ստացավ առավելագույն թվով ձայները, ՀՀԿ-ն այլընտրանք չուներ, քան ԲՀԿ-ի թեկնածուին աջակցելն էր:
Կարդացեք նաև
«Եկեք դա դիտարկենք խորհրդարանական ընտրությունների արդյունքների համատեքստում, որովհետեւ այնտեղ արդեն ապացուցվել էր, որ կուսակցությունը մեծ հեղինակություն ունի, մեծ աջակցություն ունի, եւ ում թեկնածությունը, որ կուսակցությունը պաշտպանի, նա էլ կընտրվի: Ես կարծում եմ, սա ՀՀԿ-ի կողմից տակտիկական քայլ էր, այլընտրանք չունեին, ԲՀԿ-ի թեկնածուն հաղթելու էր: Չուզեցան այնպես երեւա, որ պարտվում են այդ քաղաքում, դրա համար էլ աջակցեցին [Բալասանյանին]: Անկախ դրանից ԲՀԿ-ի թեկնածուն այնտեղ հաղթելու էր», – ասաց Օսկանյանը:
Օսկանյանի կարծիքով` այսօրվա հիմնական խնդիրներից մեկը, որը պետք է հաղթահարվի, իշխանության տարաձուլումն է, որպեսզի տարբեր կուսակցություններ ավելի մեծ դերակատարություն ունենան եւ իշխանության բաժանումը կուսակցությունների միջեւ ավելի հստակ լինի:
«Գյումրիում ԲՀԿ-ի հաղթանակը համարենք դրա կարեւորագույն առաջին քայլերից մեկը, համենայնդեպս, այդ ուղղությամբ պայքարը շարունակվելու է: Ես անձամբ հետեւողական եմ լինելու, որ վերջիվերջո մենք հասնենք նրան, որ մեր քաղաքական համակարգում իսկական հակակշիռներ լինեն, որպեսզի կարողանանք արդեն համատեղ որոշումներով երկիրը դնել զարգացման ճիշտ ճանապարհին», – ասում է նա:
ԲՀԿ-ն նախագահական ընտրությունների վերաբերյալ իր դիրքորոշումը հոկտեմբերին կհայտնի
Անդրադառնալով գալիք տարի կայանալիք նախագահական ընտրություններին` Վարդան Օսկանյանը տեղեկացրեց, թե ԲՀԿ-ն այս հոկտեմբերին կհայտնի իր դիրքորոշումը, թե ում է սատարելու այդ ընտրություններին:
«Ես կարծում եմ, որ արդեն հոկտեմբերի մեջ բոլոր կուսակցությունները, ոչ միայն ԲՀԿ-ն, իրենց հստակ դիրքորոշումը պետք է ունենան: Այս պահի դրությամբ վստահ եմ, որ տարբեր խորհրդակցություններ են արվում, ինչ-որ քննարկումներ կան` նույնիսկ միջկուսակցական, բայց վերջնական որոշումներին հասարակությունը դեռ պետք է սպասի», – ասաց Օսկանյանը` հավելելով, թե դժվարանում է ասել` արդյոք ոչ կոալիցիոն ուժերը մեկ թեկնածուով կմասնակցեն նախագահական ընտրություններին. – «Քաղաքականության մեջ ոչ մի բան պետք չէ բացառել, բայց ինչ կլինի, ժամանակը ցույց կտա», – ասաց նա:
Հարցին, թե ինքը մտադի՞ր է առաջադրվել նախագահական ընտրություններին, Օսկանյանը պատասխանեց. – «Դեռ շատ վաղ է դրա մասին խոսելը, որովհետեւ ես արդեն ԲՀԿ-ի անդամ եմ, անհատ քաղաքական գործիչ չեմ, որ ինքնուրույն իմ որոշումը կայացնեմ: Ինչ վերաբերում է կուսակցության որոշմանը, դրա մասին բազմիցս ասվել է, թերեւս այս հարցը ամբողջությամբ չի քննարկվել, այդ կապակցությամբ որոշում չկա: Այն պահին, երբ լինի, հասարակությունը առաջինը կիմանա դրա մասին»:
Օսկանյանն անդրադարձավ նաեւ Հայաստանում առկա սոցիալ-տնտեսական վիճակին` հայտարարելով, թե կառավարության հրապարակած տնտեսական աճի թվերը չեն համապատասխանում իրականությանը, եւ այդ ֆոնին կառավարությունն էլ չի կարողանում պայքարել մոնոպոլ կառույցների դեմ:
«Այն թվերը, որոնք ներկայացվում են, բավական հուսադրող են, խոսում են մինչեւ յոթ տոկոս տնտեսական աճ ապահովելու մասին, բայց դա չի համապատասխանում իրական պատկերին: Նախ բիզնեսը դա իր վրա չի զգում, բոլորը դժգոհում են իրենց բիզնեսից, գտնում են, որ այնտեղ աճ չկա: Մյուս մակրոտնտեսական չափանիշները համապատասխան աճ չեն արձանագրում, այսինքն աղքատությունը չի նվազում, հարկային եկամուտները չեն ավելանում, ժողովրդի կենսամակարդակը չի բարձրանում», – ամփոփեց Օսկանյանը:
Սարգիս Հարությունյան
«Ազատություն» ռադիոկայան
