Լեյտենանտ Արտակ Նազարյանի մահվան գործով դատավարության սեպտեմբերի 13-ի նիստում տուժողի իրավահաջորդի ներկայացուցիչ, փաստաբան Մուշեղ Շուշանյանն ասաց, որ նախաքննությամբ տվյալներ են ձեռք բերվել Արտակ Նազարյանի մահվան նախորդ օրը վաշտի հրամանատար Գագիկ Ուդումյանի եւ Ա. Նազարյանի միջեւ, կապիտան Հակոբ Մանուկյանի հեռախոսով, կայացած հեռախոսազրույցի մասին: Մանուկյանի հեռախոսի բարձրախոսը միացված է եղել, Ուդումյանը վիրավորական արտահայտություններ է թույլ տվել Նազարյանի հասցեին, վերջինս պատասխանել է Ուդումյանին, դրանից հետո նրանք պիտի հանդիպեին, Ուդումյանը՝ «երեք աստղանի հրեշը» (զինվորներն այդ մականունն են դրել նրան-Ո.Ս.) պիտի գար եւ «հարցերը լուծեր»:
Շուշանյանը որպես վկա դատակոչված գործով քննիչ Լեւոն Պետրոսյանին հարցրեց .«Ո՞րն է պատճառը, որ նախաքննական մարմինը մեղադրանք է առաջադրել քրեական գործով 5 ամբաստանյալներին եւ մեղադրանք չի առաջադրել Գագիկ Ուդումյանին: Ո՞րն է այն չափանիշը, որ դուք որոշել եք, որ Արտակ Նազարյանը չէր կարող ինքնասպան լինել Գագիկ Ուդումյանի հետ խոսակցության ազդեցության տակ, մանավանդ, որ այդ խոսակցությունը տեղի է ունեցել դեպքի նախորդ օրը»: Դատավոր Մարդանյանը հանեց հարցը, ասելով, որ այն մեղադրանքի ծավալի հետ կապ չունի, քրեական գործով Ուդումյանի նկատմամբ հարուցված մեղադրանք չկա:
Ոսկան ՍԱՐԳՍՅԱՆ
