«Չէ, երեկ մի մոմենտ լսեցի, որտեղի՞ց պետք է ես իմանամ, առայժմ տեղյակ չեմ, պետք է տպագրվի, նոր կիմանանք»,- այսօր կառավարության նիստից հետո լրագրողներին ասաց Գիտությունների ազգային ակադեմիայի նախագահ Ռադիկ Մարտիրոսյանը` անդրադառնալով գիտության ոլորտում Վերահսկիչ պալատի արձանագրած խախտումներին: Ավելի ուշ նա պնդեց, որ Վերահսկիչ պալատի արձանագրած խախտումները մանր-մունր խախտումներ են. «Ինչ -որ բաների մասին նրանց հաշվետվության մեջ կար, երկու տարի առաջ էր… Խախտումները այնպիսի խախտումներ չեն, որ չարաշահում լինի, խախտումները եղել են այս կամ այն օրենքի բանը ճիշտ կիրառելու կամ չկիրառելու մասին: Այդ մասին Վերահսկիչ պալատը գրել է եզրակացությունը, ունեցել ենք քննարկումներ: Եղել են փոքր գումարներ, որոնք վերադարձրել ենք»: Գիտության ոլորտում ՎՊ-ի արձանագրած խախտումը, թե նույն թեման կրկնակի է ֆինանսավորվել, պարոն Մարտիրոսյանն ասաց. «Ֆինանսավորումն իրականցնում է պետական կոմիտեն, եթե կոմիտեն կրկնակի գումար է տվել, պետական կոմիտեն պետք է պատասխանի»:
Արփինե ՍԻՄՈՆՅԱՆ
