Ժամանակակից արվեստագետը կնոջ մարմինը համադրել է հին հայկական նշանների հետ (ֆոտոշարք)

Օրերս «Դալան» ցուցասրահում տեղի ունեցավ ժամանակակից արվեստի ներկայացուցիչներ Գագիկ Չարչյանի, Դավիթ Կարեյանի, Եվգինե Մարտիրոսյանի, Արթուր Սարգսյանի, Կարինե Մնացականյանի, Դիանա Հակոբյանի, Կարինե Մացակյանի եւ Մերի Մունի խմբակային ցուցահանդեսը:

Aravot.am-ի հետ զրույցում Եվգինե Մարտիրոսյանն ասաց, որ իր ներկայացրած ժամանակակից արվեստի երկու գործերը կոչվում են՝ «Այն, ինչի կարիքն ունես, սերն է», իսկ մյուսը՝ «Կանացի»: «Առաջինում կնոջ մարմինը համադրված է հին հայկական նշանների հետ, որոնք գտնվել են ժայռապատկերների եւ խեցեղենի վրա: Միավորելով երկու տարբեր մշակույթներ՝ ցանկացել եմ ցույց տալ կնոջ անկախությունը. նրա որովայնը մերկ է»,- ասաց Եվգինե Մարտիրոսյանը:

Նրա խոսքով, ժամանակակից արվեստը Հայաստանում բավական լավ մակարդակի վրա է, քանի որ կան որակյալ եւ մրցունակ արվեստագետներ. «Ներկայումս ժամանակակից արվեստի վրա երկաթյա վարագույրներ չկան: Ժամանակի ընթացքում հայ արվեստագետները ներմուծեցին ժամանակակից արվեստի աշխարհում ընդունված ճյուղերը՝ փոփ-արտ, աբստրակտ, ինստալացիա, վիդեո-արտ»: Արվեստագետը հավելեց, որ որոշ ստեղծագործողներ կիրառում են թվային տեխնոլոգիաներ՝ նոր որակ ներմուծելով արվեստի բնագավառ:

Ժամանակակից արվեստագետ Արթուր Սարգսյանն իր աշխատանքներում օգտագործում է արխիվային լուսանկարներ՝ համադրելով դրանք աբստրակցիայի հետ: Մեր զրուցակիցն ասաց, որ ներկայացրած երկու գործը կոչվում է «Պատկերների միջեւ». «Սեփական հայեցողությամբ ընտրված պատկերները նկարներում ներկայացված են ետին պլանում՝ «երազային» վիճակում: Ետին պլանի վրա մեծ վրձնահարվածներով ստեղծել եմ տողեր՝ համադրելով դրանք գրաֆիկայի հետ: Սկզբում օգտագործում եմ մետաքսագրաֆիկա եւ առհասարակ՝ տարբեր տեխնիկական միջոցներ՝ գաղափարներն արագ կյանքի կոչելու համար»:

Սարգսյանը հավելեց, որ ժամանակակից արվեստը Հայաստանում բավարար ուշադրության չի արժանանում. «Միգուցե պատճառը երկրի տնտեսական վիճակն է: Իսկ, օրինակ, ԱՄՆ-ում անհատներն են ձեռնամուխ թանգարանների զարգացմանը. անգամ ֆրանսիացի նկարիչներն են գնում ԱՄՆ՝ ցուցադրությունների: Առհասարակ, օտարերկրացիները հավասար մոտեցում ունեն հայ արվեստագետների գործերի նկատմամբ: Հայ արվեստը դրսում որպես այդպիսին չեն ճանաչում, քանի որ բավարար չափի ցուցադրություններ չկան»:

ԼՈՒԻԶԱ ՍՈՒՔԻԱՍՅԱՆ