Ազգային ժողովում մեկնարկել է կառավարության եւ պատգամավորների հարցուպատասխանը: Կառավարությանը հարցեր ուղղելու համար հերթագրվել է 20 պատգամավոր:
ՀՅԴ խմբակցության ներկայացուցիչ Արծվիկ Մինասյանը հետաքրքրվեց, թե կա՞ արդյոք մեր կառավարության օրակարգում Եվրասիական միությանը անդամակցության հարցը, ստացե՞լ է արդյոք ՀՀ կառավարությունը միությանն անդամակցելու պաշտոնական առաջարկ, եւ ընդհանրապես որքանո՞վ են կառավարությունում կարեւորում Եվրասիական միությանը Հայաստանի անդամակցությունը:
Վարչապետ Տիգրան Սարգսյանը դաշնակցական պատգամավորին պատասխանեց, որ Հայաստանի կառավարությունը Եվրասիական միությանն անդամակցելու պաշտոնական հրավեր չի ստացել այն պարզ պատճառով, քանի որ դեռեւս միության կազմավորման մասով որեւէ հստակություն չկա: Վարչապետը սակայն նկատեց, որ Հայաստանը շահագրգիռ է ինտեգրացիոն բոլոր գործընթացներին ներգրավվելու առումով, լինի դա ԱՊՀ, եվրոպական, թե եվրասիական միությունների շրջանակներում:
Կարդացեք նաև
Տիգրան Սարգսյանը նաեւ նկատեց, որ ինքն այն կարծիքին չէ, որ ինտեգրացիոն գործընթացները պետք է հակադրել: Հայաստանի վարչապետի հավաստմամբ՝ Ռուսաստանի Դաշնության քաղաքական ղեկավարությունն էլ այն կարծիքին է, որ բոլոր տեսակի ինտեգրացիոն գործընթացները պետք է փոխլրացնել:
Նելլի ԳՐԻԳՈՐՅԱՆ
