Մարտի 1-ի քրեական գործը քննող քննչական խմբի ղեկավար Վաղինակ Ջանազյանը երեկ մեր թղթակցի հետ զրույցում հերքել է Մարտի 1-ի քրեական գործի նախաքննությունը կասեցնելու մասին լուրերը։ Ըստ Ջանազյանի, Մարտի 1-ի քրեական գործի քննության հետ կախված որեւէ փոփոխություն չկա, ինչպես նախկինում՝ նախաքննությունը շարունակվում է։ Ավելին, նա նաեւ հաստատել է, որ ՀՀ ոստիկանության զորքերի չորս ենթասպաները՝ Լեւոն Հակոբյանը, Ավետիք Աթաբեկյանը, Մկրտիչ Ղարիբյանը եւ Վարդան Սահակյանը շարունակում են մնալ մեղադրյալի կարգավիճակում։ Նշված ոստիկանները հենց այն անձինք են, որոնք Մարտի 1-ի դեմքերի ժամանակ «Չերյոմուխա 7» տեսակի գազային նռնակ փամփուշտներ են կրակել եւ պատասխանատվություն են կրում առնվազն երեք քաղաքացու սպանության եւ բազմաթիվ մարդկանց վիրավորելու համար։ Պաշտոնապես նրանց մեղադրանք է առաջադրված ՀՀ քրեական օրենսգրքի 373-րդ հոդվածի 1-ին, 2-րդ եւ 3-րդ մասերով (զենքի հետ վարվելու կանոնները խախտելը, որը առաջացրել է ծանր հետեւանքներ): Սակայն, այս մեղադրանքը ձեւական բնույթ է կրում, քանի որ մեղադրանք առաջադրելուց այն կողմ ոչինչ չի արվել, իսկ քաղաքացիների սպանության համար պատասխանատու ոստիկանները շարունակում են մնալ ազատության մեջ, եւ նրանց նկատմամբ որպես խափանման միջոց ընտրվել է հանրապետությունից չհեռանալու մասին ստորագրությունը։ Ընդամենը։
«Հայկական ժամանակ»
