«Եթե մի մարդ, մի կացնով կարող է ինչ-որ մի բան անել, նման արարքը երբեւէ չի կարող որակվել հերոսություն: Եվրամիությունում մենք շատ մտահոգված ենք այն իրադարձությամբ, որ վերջին օրերի ընթացքում տեղի է ունեցել », – այսօր արտգործնախարար Էդվարդ Նալբանդյանի հետ հանդիպման ժամանակ ասաց Լյուքսեմբուրգի Մեծ Դքսության փոխվարչապետ, արտաքին գործերի նախարար Ժան Ասելբորնը` անդրադառնալով հայ սպային կացնահարած ադրբեջանցի Ռամիլ Սաֆարովին Ադրբեջանում հերոսացնելուն:
«Ես ինձ թույլ եմ տալիս մասնավոր կերպով իմ Հունգարիայի գործընկերոջը ուղերձ փոխանցել, կարծում եմ` Ղարաբաղի հիմնախնդրի առումով , 2005-ին Լյուքսեմբուրգը, ստանձնելով եռամիության նախագահությունը,
ուղերձ էր հղել , որը, ցավոք սրտի, նույնն էր` ոչ միայն պետք է վստահություն ներշնչել համանախագահ երկրների նախագահներին, այլեւ աջակցել այս իրավիճակը հարթելու համար: Կարծում եմ` Հայաստանը այն երկրների կողքին է, որոնք հավանություն են տալիս Ղարաբաղի հիմնախնդրի կարգավորման ուղղությամբ Մինսկի խմբի համանախագահների շրջանակում մշակված 2000 թվականի սկզբունքներին »,- հավելեց պարոն Ասելբորնը : Նա նաեւ ասաց, որ Լյուքսեմբուրգը ուղերձ ունի նաեւ Թուրքիային. « Անել ամեն ինչ, որ երկու արձանագրությունները, որոնք մշակվել եւ ստորագրվել են, վավերացվեն: Մենք Եվրամիությունում նույն դիրքորոշումն ունենք եւ այս նույն մտայնությամբ ենք առաջնորդվում»: Պարոն Ասելբորնը առաջին անգամ է այցելում Հայաստան ու նրա խոսքերով, թեեւ այնքան էլ լավ չի ճանաչում Հայաստանը, բայց գիտի , որ եկել է մի երկիր, որտեղ աշխարհաքաղաքական առումով այնքան էլ նպաստավոր չէ: Պարոն Ասելբորնը պատմեց, որ այսօր առավոտյան այցելել է Ցեղասպանության թանգարան ու շատ հուզվել է: Նրա խոսքերով, դեռ իր աչքերի առջեւ է այն լուսանկարը, որտեղ մայրը երկու երեխաներին էր գրկել, որոնցից մեկն արդեն մահացած էր. «Հուսանք բավականաչափ ուժ կունենանք դասավանդելու ճշմարտությունն ու ամեն ինչ անել, որ նմանատիպ վայրագություններն այլեւս չկրկնվեն »:
Կարդացեք նաև
Արփինե ՍԻՄՈՆՅԱՆ
