Կիրակի Գյումրու պատմության մեջ արձանագրվեցին ամենապասիվ ու տխուր ընտրությունները. մարդկանց գերակշռող մասը հարկ չհամարեց տնից դուրս գալ, մի մասն էլ՝ 3359 հոգի, իր ձայնը չկորցնելու համար թեեւ հասավ ընտրատեղամաս, սակայն իր բողոքն արտահայտեց՝ կամ բոլորի վրա խաչ քաշելով, կամ առանց որեւէ մեկին ընտրելու քվեաթերթիկը հանձնելով, նաեւ թունդ հայհոյանքներ գրելով: Իսկ Վարդան Ղուկասյանի կողմնակիցները, ոչ ավել-ոչ պակաս, քվեաթերթիկներում ավելացնում էին 13 տարվա գահակալի անունը ու դիմացը «պտիչկա» դնում: Բողոքի այս ձեւը համատարած կիրառվել է գրեթե բոլոր ընտրատեղամասերում: Օրինակ՝ Գյումրու մանկավարժական ինստիտուտում գտնվող թիվ 34/02 ընտրատեղամասի ընտրական հանձնաժողովի նախագահ Արաքսյա Կիրակոսյանը մեզ հետ զրույցում տեղեկացրեց, որ շուրջ 40 անվավեր ճանաչված քվեաթերթիկներից 6-7-ում ավելացված է եղել Վարդան Ղուկասյանի անունը: Նույնը գրանցվել է նաեւ «Պրոգրես» համալսարանում տեղակայված թիվ 34/33 ընտրատեղամասում, Ջորջ Բայրոնի անունը կրող թիվ 20 դպրոցում գտնվող 34/57 ընտրատեղամասում: Գյումրեցիներն այս քայլով ոչ թե իրենց կրքոտ սերն են արտահայտել Ղուկասյանի նկատմամբ, այլ ընդամենը ցույց են տվել, որ նախագահական սցենարով բեմադրված ու թելադրված ընտրություններն ամենեւին էլ իրենց սրտով չեն:
«Առավոտ» օրաթերթ
