«Նախորդ շաբաթներին 120.000 ից ավելի վարակված համակարգիչ է աշխատել Հայաստանի վրա»,- հայ-ադրբեջանցի հաքերների վերջին պայքարին անդրադառնալով՝ «Նովոստի» մամուլի կենտրոնում այսօր ասուլիսի ժամանակ ասաց տեղեկատվական անվտանգության մասնագետ Սամվել Մարտիրոսյանը: Ըստ նրա, հարձակումները գալիս էին հիմնականում Պակիստանից, Ադրբեջանից, Թուրքիայից. «Ով էր իրագործողը, դժվար է ասել, բայց դժվար չէ հասկանալ, թե ով է գումար տրամադրել: Այսօր Ադրբեջանն այդ հնարավորությունները չունի ինքնուրույն կազմակերպել նմանատիպ հարձակումներ, բայց շատ մեծ շուկա կա եւ հնարավոր է պատվիրել նմանատիպ հարձակումներ»:
Պարոն Մարտիրոսյանի պատմելով, հայկական լրատվամիջոցները հարձակման թիրախում հայտնվեցին մայոր Սաֆարովի` Բաքվի օդանավակայան իջնելուց մի քանի ժամ հետո: Նրա խոսքերով, ադրբեջանցիները բացի հաքերական հարձակումներից, նաեւ DDOS հարձակումներ են իրականացնում, որի դեպքում մեծ քանակի այցելություններ են գեներացվում, ու կայքը սկսում է չաշխատել:
Ադրբեջանցիներին հայկական կողմից այս անգամ հակահարված պատրաստել էին հիմնականում սոցիալական կայքերում համախմբված երիտասարդներ: Պարոն Մարտիրոսյանի խոսքով, ի տարբերություն ադրբեջանցի հաքերների հարձակումների, որոնք գրեթե լուրջ հետեւանքներ չունեցան, ադրբեջանական լրատվամիջոցները հայկական կողմի հարվածներից օրերով չեն աշխատել:
Կարդացեք նաև
Ներկայումս, ըստ պարոն Մարտիրոսյանի, հայ-ադրբեջանական հաքերների միջեւ հրադադար է:
Արփինե ՍԻՄՈՆՅԱՆ
