ԱԺ նախկին պատգամավոր Վիկտոր Դալլաքյանը, որն առաջարկում էր խստացնել մանկապիղծների պատժաչափը, որոշել էր դրա հետ կապված փոփոխություններ կատարել Քրեական օրենսգրքում: Մի քանի օր առաջ ԱԺ-ի Պետական-իրավական հարցերի մշտական հանձնաժողովի նախագահ Դավիթ Հարությունյանը հանձնաժողովի նիստի ընթացքում առաջարկեց, քանի որ Դալլաքյանը չկա, որեւէ մեկը ստորագրի այդ օրինագծի տակ: Բայց պարոն Հարությունյանը պատմեց, որ մի պատմություն ունեցել են, երբ պատգամավորներից մեկն ուզեցել է ստորագրել նախագծի տակ, սակայն Վիկտոր Դալլաքյանը իր առարկություններն է հայտնել, դեմ է եղել եւ թույլ չի տվել:
Այսօր Aravot.am-ը պարոն Դալլաքյանից հետաքրքրվեց, թե ինչո՞ւ թույլ չի տալիս, որ որեւէ մեկը ստորագրի ու ընդունի իր հեղինակած օրենքը: Նա պատասխանեց. «Ե՞ս, ես նմա՞ն եմ թույլ չտվողի»: Նրա մեկնաբանությամբ՝ «ԱԺ կանոնակարգի համաձայն, ես իմ ելույթի ժամանակ ասել եմ, որ 20-ից ավելի օրենսդրական նախաձեռնություններ եմ ունեցել, որոնք օրակարգում եւ քննարկման առարկա են եղել: Այդ օրենսդրական նախաձեռնություններին տեր կանգնելու եղանակները եւ ձեւերը ես գիտեմ: Ինչ-որ մեկին թույլ տալ- թույլ չտալը ԱԺ կանոնակարգով է: Եթե նախկին հեղինակը իր համաձայնությունը տալիս է, ուրեմն որեւէ պատգամավոր կարող է դրանք հեղինակել: Իսկ քանի որ ես նշանակվել եմ ՀՀ նախագահի ներկայացուցիչ, արդեն ես ինքս կարող եմ այդ օրենսդրական նախաձեռնությունների ճակատագիրը որոշել: Կան համապատասխան մեխանիզմներ, փակագծերը ես չեմ ուզում բացել, որոնց միջոցով դրանք կներկայացվի ԱԺ-ին, դուք անհոգ եղեք»:
Հռիփսիմե ՋԵԲԵՋՅԱՆ
