Այսօր ինքնասպանությունների կանխարգելման միջազգային օրն է: Այդ առիթով հոգեբանական գիտությունների թեկնածու, դոցենտ, սուիցիդոլոգ Կամո Վարդանյանը հանդիպեց լրագրողների հետ, ներկայացնելով այն պատճառները, ըստ որոնց մարդիկ դիմում են ինքնասպանության:
Վարդանյանի փոխանցմամբ՝ պատճառները շատ են, շուրջ 800. «Աշխարհում մասնագետները ցանկանում են ինքնասպանության երեւույթը դիտարկել մեկ պատճառականության սկզբունքով, բայց ես այդ մոտեցումը սխալ եմ համարում: Այս երեւույթին պետք է մոտենալ մեծ խորությամբ եւ բազմակողմանի»:
Ինչ վերաբերում է ինքնասպանությունների կանխարգելմանը, ապա, ըստ Վարդանյանի, այս առումով պետությունը պետք է հատուկ ռազմավարություն մշակի. «Ինքնասպանություն երեւույթը երբեք չի վերանա, դա մարդուն բնորոշ բան է, չնայած ճիշտ կազմակերպված գործընթացի ազդեցության տակ դրանց քանակը կարելի է քչացնել: Երեւույթը պետք է խորապես, գիտական մակարդակով ուսումնասիրել, ոչ թե սիրողական: Այդ մասին պետք է խոսի միայն մասնագետը: Բուհերում անհրաժեշտ է դասախոսություններ անցկացնել: Հասարակության լայն խավերին գաղափար տալ ինքնասպանության երեւույթի, ինքնասպանի հոգեկանոն դրսեւորվող փոփոխությունների մասին, որովհետեւ մարդը միանգամից չի կատարում ինքնասպանություն, սովորաբար դա տեւում է մինչեւ 1,5 տարի: Հասարակությանը պետք է սովորեցնել սուիցիդի այն բանալիների մասին, որոնց ականատես լինելուց անհատը կարողանա ուղղորդել տվյալ անձնավորությանը եւ տեղյակ պահել նրա հարազատներին: Բացի այդ՝ մենք պետք է ուշադիր լինենք մեր կողքինների նկատմամբ»,-ավելացրեց Վարդանյանը:
Կարդացեք նաև
Բանակում կատարվող ինքնասպանությունների մասին էլ սուիցիդոլոգն ասաց, որ բանակը հասարակության մի մասն է ու այն, ինչ կատարվում է հասարակության մեջ, խորթ չէ նաեւ բանակին. «Երբեմն բանակում կատարվող ինքնասպանությունները արդյունք են քաղաքացիական կյանքում դրսեւորած վարքի: Խնդիր ունենալով տղան գնում է բանակ, խնդիրն այնտեղ չի լուծվում ու բանակում իրականացնում է ինքնասպանությունը»:
Սուիցիդոլոգը հավելեց, որ բնակչության թվի մեծացման հետ մեծանում է նաեւ լարվածության, ինքնասպանությունների թիվը: Ներկայացնելով վիճակագրական տվյալներ, Վարդանյանը հայտնեց, որ 2009 թվականին ՀՀ-ում ինքնասպանություն եւ ինքնասպանության փորձ է արել 498, 2010-ին՝ 592, 2011-ին՝ 647 մարդ:
Եվա ՀԱԿՈԲՅԱՆ
