Եվրոպայի Խորհրդի Խորհրդարանական Վեհաժողովի մոնիթորինգային հանձնաժողովում մի քանի օր առաջ քննարկվել էր Սաֆարովի արտահանձնման եւ Ադրբեջանի հարցը: ԵԽԽՎ-ում Հայաստանի պատվիրակության ղեկավար, ԱԺ ՀՀԿ խմբակցության անդամ, պետական-իրավական հանձնաժողովի նախագահ Դավիթ Հարությունյանն Aravot.am-ին խոստացել էր Երեւան վերադառնալուց հետո մանրամասներ ներկայացնել: Այսօր մեզ հետ զրույցում պարոն Հարությունյանը նշեց, որ «ԵԽԽՎ մոնիթորինգի հանձնաժողովի նիստերը քանի որ դռնփակ են, որպես կանոն, էթիկան պահանջում է մանրամասներ չներկայացնել նիստից: Միայն կարող եմ ասել, որ մենք երկուսով՝ ես, Արմեն Ռուստամյանը ելույթ ենք ունեցել, ելույթը եղել է ոչ միայն Սաֆարովի դեպքի հետ կապված, այլեւ Ադրբեջանի նախնական զեկույցի հետ կապված, որը նախապատրաստվել էր Ադրբեջանի զեկուցողների կողմից: Մենք բավականին լուրջ քննադատության ենք ենթարկել այդ զեկույցը: Շատ քիչ արձագանքներ եղան, եւ հենց դրանով էր պայմանավորված իմ հայտարարությունը, որ Եվրոպայի խորհրդի խորհրդարանական վեհաժողովը գահավիժում է: Հետագայում իրավական հարցերի հանձնաժողովում շատ ավելի լուրջ քննարկում է եղել հատկապես Սաֆարովի գործի հետ կապված»:
Հռիփսիմե ՋԵԲԵՋՅԱՆ
