«Ժառանգություն» կուսակցության փոխնախագահ Արմեն Մարտիրոսյանը «Պոստ սկրիպտում» մամուլի ակումբում խոսելով առաջիկա ներքաղաքական զարգացումների մասին, ստեղծված իրավիճակում խիստ կարեւորեց 2013-ին կայանալիք նախագահական ընտրությունները: «Եթե ֆորս-մաժոր չլինի, «Ժառանգությունն» անպայման կմասնակցի նախագահական ընտրություններին»,- հայտարարեց նա՝ վերահաստատելով, որ իր, ինչպես նաեւ կուսակցությունում մեծամասնության համար նախընտրելի թեկնածուն Րաֆֆի Հովհաննիսյանն է:
Արմեն Մարտիրոսյանը ըստ էության բացառելով ընդդիմադիր դաշտի վերամիավորման եւ միասնական թեկնածուով հանդես գալու որեւէ հնարավորություն, հայտարարեց, որ հնարավոր է լինեն ընդդիմադիր այլ թեկնածուներ: Վերջիններիս գոյությունը սակայն, բանախոսի համոզմամբ, որեւէ կերպ չի կարող խաթարել «Ժառանգության» բնական գործունեությունը: Aravot.am-ի հարցին՝ ե՞րբ ավելի հստակ կլինի Րաֆֆի Հովհաննիսյանի եւ «Ժառանգության» վերջնական դիրքորոշումը առաջիկա նախագահական ընտրությունների վերաբերյալ, Արմեն Մարտիրոսյանը պատասխանեց. «Շուտով, կարծում եմ, ինքներդ կունենաք հնարավորություն այդ հարցը Րաֆֆի Հովհաննիսյանին ուղղելու»:
Ադրբեջանին վերադարձված հայ սպա Գուրգեն Մարգարյանին կացնահարած Ռամիլ Սաֆարովի եւ այդ առիթով ստեղծված համաշխարհային նոր իրողության ենթատեքստում, Արմեն Մարտիրոսյանի համոզմամբ, Հայաստանի իշխանությունը րոպե առաջ պետք է սկսի մեր երկրում կառուցվածքային փոփոխու թյունների իրականացումը, ինչը կհանգեցնի նաեւ իշխանության նկատմամբ հասարակության եւ քաղաքական ուժերի կողմից վստահության ձեւավորման:
Նելլի ԳՐԻԳՈՐՅԱՆ
