«Amnesty International» իրավապաշտպան կազմակերպությունն այսօր իր մտահոգությունն է արտահայտել մարդասպան Սաֆարովին Ադրբեջանին արտահանձնման փաստի առիթով և կարծում է, որ այս գործողությունները կարող են ընկալվել որպես «էթնիկական դրդապատճառներ ունեցող բռնության աջակցություն»:
Միջազգային հեղինակավոր իրավապաշտպան կազմակերպության պաշտոնական հայտարարությունում մտահոգություն է արտահայտվել, որ Ադրբեջանի կառավարության այս գործողությունները կսրեն ադրբեջանցիների և հայերի միջև առկա լարվածությունն ու կխրախուսեն էթնիկական հողի վրա հետագա բռնությունները։
Կազմակերպությունը կոչ է անում երկու պետությունների կառավարություններին հրապարակայնորեն դատապարտել էթնիկական հողի վրա բռնությունները:
«Սաֆարովին, որը իր իսկ խոստովանությամբ գլխատել էր մարդուն միայն նրա համար, որ հայ էր, ներում է շնորհվել, ապա ազատ արձակվելուց հետո Ադրբեջանի նախագահ Ալիևի կողմից մայորի կոչում է շնորհվել», – հիշեցնում է «Amnesty International»-ը։
«Ներում շնորհելով, ապա Ռամիլ Սաֆարովին խրախուսելով՝ նախագահ Ալիևը ադրբեջանցիներին ուղերձ է հղել, որ հայերի դեմ բռնությունները ոչ միայն ընդունելի, այլև խրախուսելի են։ Ադրբեջանի կառավարությունը պետք է չեղյալ հայտարարի Սաֆարովին տրված պարգևներն ու հրապարակայնորեն դատապարտի էթնիկական հողի վրա բռնությունները։ Հայաստանի կառավարությունը ևս պետք է հասկացնի, որ էթնիկ ադրբեջանցիների նկատմամբ վրեժն անընդունելի է», – իր ուղերձում շեշտել է «Amnesty International» միջազգային իրավապաշտպան կազմակերպությունը:
