Արդեն 3 օր է` նախագահի նստավայրի մոտ հացադուլ է անում Էմմա Սահակյանը: Նա, բացի ջրից, ոչինչ չի ընդունում եւ մտադիր է շարունակել իր հացադուլը այնքան ժամանակ, քանի դեռ իր խնդրին Բաղրամյան 26-ը լուծում չի տվել:
«Ձերբակալեք հանցագործ Սուսաննա Մարգարյանին» ցուցանակով նա արդեն մի քանի ամիս է` նստացույց է անում նախագահի մոտ` գիշեր-ցերեկ, իսկ հիմա արդեն անցել է հացադուլի` պահանջելով վերադարձնել իր տունը, քանի որ 2009-ից հայտնվել է փողոցում:
Էմմա Սահակյանի պատմելով, այն իրենից խլել է հարազատ քրոջ դուստրը՝ «Հիշողություն վերածնունդ» բարեգործական կազմակերպության նախագահ Սուսաննա Մարգարյանը, որը քրոջ մահից հետո տիրացել է իր ողջ ունեցվածքին: Aravot.am-ը անդրադարձել է տիկին Էմմայի խնդրին:
Կարդացեք նաև
Այսօր նա պատմեց, որ նախագահականի նամակների բաժնից երեկ մոտեցել են իրեն ու առաջարկել տեղավորել նրան ծերանոցում. «Ես հրաժարվեցի: Իմ պարտքն ու պահանջն է, որ իմ ունեցվածքը վերադարձնեն: Եթե իմ ունեցվածքը վերադարձնեն` ես իմ հարցերը կլուծեմ»:
Մենք հետաքրքրվեցինք` ժառանգներ չունե՞ք: Տիկին Էմման պատմեց, որ տղան տուն, գրանցում չունի եւ Հայաստանում չի բնակվում:
Մեր հարցին` եթե նախագահականը որեւէ քայլ չձեռնարկի, որքա՞ն եք մտադիր շարունակել հացադուլը` կինը պատասխանեց. «Ես կշարունակեմ մինչեւ մահ»:
Հռիփսիմե ՋԵԲԵՋՅԱՆ
