ՀՀԿ խմբակցության ղեկավար Գալուստ Սահակյանը նեղսրտած չէ ընդդիմադիր գործընկերների հանդիմանանքից, որ ՀՀ իշխանությունները, պետական ապարատն անտեղյակ են եղել Հունգարիայի եւ Ադրբեջանի հանցավոր համաձայնությունից: «Ամեն ինչ կարելի է ասել, ամեն ինչ կարելի է շահարկել, բայց սա այդ խնդիրը չէ: Պետք է միահամուռ լինենք»,- «Առավոտի» հետ զրույցում ասաց նա՝ հավելելով. «Ընդդիմություն է, պիտի էդպես ասի, բա ինչպե՞ս ասի: Էլ չեմ ասում, որ մարդիկ մտածում են, որ նույնիսկ եթե 10 օր առաջ իմացվեր, ինչն անհնար էր, եւ հանրության համար արդեն պարզ լիներ, ընդդիմությունն անպայման պիտի «գրադները» առած հարձակվե՞ր, որ գործարքը չանեին»: Նրա կարծիքով՝ մեղավորներ եւ արդարներ չպիտի փնտրենք. «Այլ գործընթացում այնպիսի ներկայացում ունենանք, որպեսզի հնարավոր լինի հետագա գործողություններն իրագործել»: Հետաքրքրվեցինք՝ իշխանությունները դաս քաղեցի՞ն կատարվածից: «Իշխանությունները դաս քաղելու խնդիր չունեն: Իշխանություններն այն ռեզերվները, որ ունեն, ամեն ինչը տրամադրել են ԼՂՀ խնդրի եւ տվյալ խնդիրների լուծման համար: Սա իշխանությունների քաղաքական օրակարգի ամենօրյա, ամենժամյա խնդիրն է: Այստեղ պետք է տեսնել նաեւ ընդդիմադիր կողմին ու հայ հասարակությանը»,- եղավ պատասխանը:
«Առավոտ» օրաթերթ
