Այսօր լրագրողների հետ հանդիպման ժամանակ հոգեբան Կարինե Նալչաջյանն անդրադարձավ Սաֆարովին Ադրբեջանին հանձնելու փաստի հետեւանքով հայերի մոտ առաջացած հոգեբանական լարվածությանը:
«Շատ ենք խոսում ազգերի հոգեբանությունից, բայց ազգին լավ հասկանալու համար պետք է ուսումնասիրել նրա խորհրդանիշերը: Ադրբեջանի դեպքում ազգային հերոսի փետուրներով զարդարվել է մարդասպանը, պետությունը հերոսացրել է սովորական մարդասպանին, որն ընդունակ է քնած տեղը մարդուն սպանել: Նրանք պետք է ամաչեին այդ քայլի համար, ոչ թե հերոսացնեին: Այս փաստը մտածելու տեղիք է տալիս, քանի որ չենք հասկանում այդ ազգի հետ: Ի վերջո, ամոթ է»,- նշեց Նալչաջյանը, հավելելով, որ կայուն միտում կա ատելության:
Հոգեբանի ձեւակերպմամբ՝ կատարվածը թույլին բնորոշ արարք է: Ինչ վերաբերում է դրա՝ մեր հանրույթի վրա թողած ազդեցությանը, ապա ուժեղացել է «մենքի» զգացողությունը:
«Անկախ ամեն ինչից, մենք, միեւնույն է, դեռ պատերազմի մեջ ենք, քանի որ հրադադար է, եւ ցանկացած պահի պատերազմը կարող է նորից սկսվել: Ադրբեջանական հանրույթը գերագրեսիվ է հայերի նկատմամբ, չնայած նրանց ագրեսիվությունը դեռ չի նշանակում, որ պատրաստ են պատերազմի»,- հավելեց Նալչաջյանը:
Կարդացեք նաև
Դրոշներն այրելու հետ կապված էլ հոգեբանն ասաց. «Չի կարելի էմոցիոնալ պոռթկումները զսպել, ինչու չէ՝ կարելի է նաեւ դրոշ այրել: Չպետք է ինքներս մեզ զսպենք պաշտպանական ագրեսիայից»:
Եվա ՀԱԿՈԲՅԱՆ
