Հայ սպա Գուրգեն Մարգարյանին կացնահարած ադրբեջանցի Ռամիլ Սաֆարովին Ադրբեջան արտահանձնելու եւ Ադրբեջանի նախագահ Իլհամ Ալիեւի կողմից նրան ներում շնորհելու մասին հարցով Ազգային ժողովի
արտահերթ նիստը երեկ անցավ «բացառիկ հայրենասիրական» մթնոլորտում։ Ելույթ ունեցան մեծ թվով պատգամավորներ, ովքեր տարբեր շեշտադրումներով դատապարտում էին կատարվածը, համախմբվածության կոչեր անում, ոմանք անգործության համար քննադատում էին նաեւ արտգործնախարարությանը։ Մինչեւ երեկո տեւած «բուռն» նիստի արդյունքում՝ 90 «կողմ», 1 «դեմ» ձայներով ԱԺ-ն ընդունեց հայտարարություն, որն իր բովանդակությամբ գրեթե չի տարբերվում անցած մի քանի օրերի ընթացքում հնչած գնահատականներից ու կոչերից։ Այնպես, ինչպես տարբեր պատգամավորների կարծիքները, որոնք գրեթե ամբողջությամբ վերջին օրերին դրանց հեղինակները հասցրել էին տիրաժավորել մամուլի բոլոր
միջոցներով։ Այսինքն՝ մեծ հաշվով, ԱԺ երեկվա արտահերթ նիստն ու այդ հայտարարությունը ոչինչ չավելացրեցին։ Մինչդեռ, ԱԺ-ն՝ որպես պետության գլխավոր քաղաքական ինստիտուտ, գոնե պետք է որոշեր ստեղծված իրավիճակում Հայաստանի կողմից կատարելիք գործողությունները, դրանց հաջորդականությունը։ Այդ դեպքում արտահերթ նիստ հրավիրելը գոնե ինչ-որ իմաստ կունենար։ Սակայն ԱԺ-ն երեկ ընդամենը հերթական անգամ վավերացրեց, որ Հայաստանում ամեն ինչ որոշում է երկրի նախագահը, եւ խորհրդարանն ընդամենը «ժողովրդավարական բուտաֆորիայի» դեր է կատարում՝ գրեթե չտարբերվելով նախագահին կից Հանրային խորհրդից։
Կարդացեք նաև
Ի դեպ, այդ հարցում իրենց ջանասիրությամբ ընդդիմադիր պատգամավորները հետ չմնացին իրենց իշխանական գործընկերներից:
«168 ժամ»
