Այսօր Կարեն Դեմիրճյանի թանգարանի ամառային ցուցասրահում «Արտ լաբորատորիա» ստեղծագործական միավորումը կազմակերպել էր «Մերկ կյանք» խորագրով ցուցահանդես, որը ներկայացնում է Հայաստանում տիրող իրավիճակը` Երեւանի քարտեզով, վերջին տարիներին կատարված սպանությունների եւ ինքնասպանությունների խրոնիկայով եւ այն վայրերի տեսանյութերով, որտեղ կատարվել են սպանություններ:
Aravot.am-ի հետ զրույցում «Արտ լաբորատորիա» ստեղծագործական միավորման անդամ, արվեստագետ Արթուր Պետրոսյանը նշեց, որ ՀՀ քաղաքացիները ներկայումս հայտնվել են «մերկ» վիճակում, եւ անկանխատեսելի պահին նրանց հետ կարող է ինչ ասես պատահել, անգամ` սպանություն. «Այս ամենի պատճառը տիրող ավազակապետությունն է: Իսկ հասարակության պասիվությունը եւ անտարբերությունը սոցիալական անելանելի վիճակի արդյունք է: Ելքն իշխանափոխությունն է: Քաղաքականության մեջ արվեստն ի զորու չէ էական փոփոխություններ անել: Արվեստն առաջնահերթ կարող է մոբիլիզացնել հասարակությանը, բայց կարծես թե արվեստագետներին լսողներ չկան»:
Արթուր Պետրոսյանը հավելեց, որ դրական է վերաբերում քաղաքական դաշտում արվեստագետների ներգրավվածությանը. «Նրանք կարող են առաջ քաշել համապատասխան առաջարկություներ, որոնք կգործեն ի նպաստ ժողովրդի»:
Արվեստագետ Կարեն Օհանյանն ասաց, որ ցուցահանդեսի միջոցով սպանության փաստերին հեղինակները հադորդել են էսթետիկա. «Արվեստագետը պետք է անդրադառնա նաեւ սպանություններին եւ այլ կարեւր թեմաներին` ընդդիմանալով իր գաղափարախոսությամբ: Այսօր արվեստագետները բազմաթիվ խնդիրներ ունեն, հատկապես` սոցիալական»:
Կարդացեք նաև
Կարեն Օհանյանի խոսքով` երկիրը չպետք է հասնի այնպիսի աստիճանի, որ արվեստագետները մտածեն քաղաքականություն մուտք գործելու մասին. «Իսկ պատգամավոր-արվեստագետներին կարող եմ ցավակցել, քանի որ մտել են հանցավոր աշխարհ: Առհասարակ, մեր երկրում մշակույթն անտեսված է»:
Լուիզա ՍՈՒՔԻԱՍՅԱՆ
