ԵԽԽՎ նախագահ Ժան Կլոդ Մինյոնը հայտարարություն է տարածել Ռամիլ Սաֆարովին Հունգարիայի իշխանությունների կողմից Ադրբեջան արտահանձնելու և այդ երկրի իշխանությունների կողմից ներում շնորհելու որոշման կապակցությամբ: Ըստ ԵԽ մամուլի տարածած հաղորդագրության՝ պրն Մինյոնն ասել է. ««Միանում եմ Սաֆարովի գործած սարսափելի հանցագործության «փառաբանման» միջազգային դատապարտմանը, հանցագործության, որի համար նա դատապարտվել էր ԵԽ անդամ պետության դատարանի կողմից: Նրա ազատ արձակումն անընդունելի է և ես ծայրաստիճան հիասթափված եմ այս հարցում ԵԽ իրավական գործիքների անօրինական կիրառման փաստի առնչությամբ»:
«Այս սկանդալային ներումը մեծ բացասական հետևանքներ է թողնում Հայաստանի և Ադրբեջանի միջև առկա առանց այն էլ լարված հարաբերությունների վրա, միաժամանակ վտանգի է ենթարկում տարածաշրջանի կայունությունը: Կոչ եմ անում ադրբեջանական իշխանություններին վերանայել իրենց դիրքորոշումը Եվրոպայի խորհրդի սահմանած սկզբունքների ու իդեալների համաձայն», – ասված է ԵԽԽՎ նախագահի հայտարարությունում:
