Այսօր լրագրողների հետ հանդիպմանը քաղաքագետ Ստեփան Գրիգորյանը խոսեց «Ռամիլ Սաֆարովի արտահանձնումը. ներքաղաքական և միջազգային հնարավոր զարգացումներ» թեմայի շուրջ:
«Ոչ բոլոր քաղաքական ուժերն են հասկանում պահի լրջությունը: Պարզ է, որ առօրյա կյանքում շատ են սովորական դարձած դժվարությունները, բայց սթափվելու ժամանակն է: Խնդիրը նրանում չէ, որ իշխանությունները պետք է հակահարված տան, այլ պետք է աշխարհին հասկացնել, որ Հայաստանն իսկապես մտահոգ է կատարվածով եւ պատրաստ է պայքարել իր անվտանգության համար»,-ասաց քաղաքագետը:
Վերլուծելով դատապարտյալներին փոխանցելու Ստրասբուրգյան կոնվենցիան՝ Ատեփան Գրիգորյանը փաստեց, որ պատիժը սեփական երկրում կրելն ընդունված երեւույթ է. «Այլ բան է, երբ խախտվել են կոնվենցիայի հետեւյալ կետերը. 13-րդ հոդվածով սահմանվում է, որ միայն դատող պետությունը, տվյալ դեպքում՝ Հունգարիան, իրավունք ունի փոխել դատավճիռը: Բացի այդ, 15-րդ հոդվածի համաձայն, Ադրբեջանը փոխանցումից հետո պարտավոր է անընդհատ Հունգարիային տեղյակ պահել դատապարտյալի վճռի իրականացման մասին: Իսկ 11-րդ հոդվածով Ադրբեջանն իրավունք չունի պատիժը փոփոխել: Հետեւաբար, Հունգարիան իրավունք ունի ետ պահանջել Սաֆարովին, քանի որ վերջինս իր երկրում պատիժը չի կրում»:
Վերլուծաբանի խոսքով, Սաֆարովի դեպքով Ադրբեջանը երկու կարեւոր «մեսիջ» է ուղարկել Հայաստանին. «Առաջինն այն է, որ հային սպանողը հերոս է, եւ դա ասել է ոչ թե խելառ պատմաբանը, այլ Ադրբեջանի առաջին դեմքը: Ղարաբաղն այլեւս չի կարող գտնվել Ադրբեջանի ենթակայության տակ: Ադրբեջանի նախագահն իր քայլով հաստատեց դա՝ Ղարաբաղյան հարցը մտցնելով նոր էտապ: Մյուս «մեսիջն» այն է, որ Սաֆարովին հերոսացնելով ու մայորի կոչում շնորհելով՝ Ադրբեջանն ասաց, որ թքած ունի եվրոպական դատարանների եւ որոշումների վրա: Հետեւաբար, Եվրոպան պետք է զսպի Ադրբեջանին, որը սպառնում է պատերազմ սկսել»:
Կարդացեք նաև
Գրիգորյանն ասաց, որ կողմնակից չէ Մինսկի խմբից դուրս գալու մտքին, քանի որ համանախագահող երկրների արձագանքները հօգուտ Հայաստանի են. «Մադրիդյան սկզբունքների շարքում պետք է հստակ ֆիքսել, որ Ղարաբաղն այլեւս Ադրբեջանի ադմինիստրատիվ ենթակայության տակ չէ: Ամենադիպուկը Եվրախորհրդի գլխավոր քարտուղարի հայտարարությունն էր. նա հասկանում է, որ սպանության խրախուսման պարագայում վտանգի տակ է դրվում յուրաքանչյուր հայի անվտանգությունը: Բայց մինչ Եվրամիությունը եւ Եվրապառլամենտը գնահատական չտան, պետք չէ մասնակցել Եվրանեստին»:
Անդրադառնալով հայերի շրջանում Սաֆարովի հանդեպ բորբոքվող կրքերին՝ քաղաքագետը հատկապես երիտասարդներին կոչ արեց հեռու մնալ վրեժխնդրության մտադրությունից. «Թեհլերյանի քայլի հետ զուգահեռներ չանցկացնեք, քանի որ այն ժամանակ մենք չունեինք անկախ պետականության: Մենք տեռորիստական երկիր չենք՝ մարդասպան չենք դառնա ու չենք հավասարվի Սաֆարովին եւ Ադրբեջանի դիրքորոշմանը: Որպես ցիվիլ ազգ՝ շեշտը պետք է դնենք իրավական դաշտի վրա: Այնպես որ՝ ոչ մի վրեժխնդրություն. խելոք մնացեք»:
Լուիզա ՍՈՒՔԻԱՍՅԱՆ
