Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի նախագահությամբ այսօր շարունակվեց «Ռեգնում» գործակալության Երեւանի բյուրոյի ղեկավար Ռուբեն Գրդզելյանի եւ Կոտայքի մարզի դատախազ Մեսրոպ Մանրիկյանի որդու՝ Ալբերտ Մանրիկյանի դեմ հարուցված քրեական գործով դատական նիստը: Այն տեւեց 6 րոպե, քանի որ այս գործով Մանրիկյանի պաշտպան Վաղարշակ Գեւորգյանը խնդրեց ողջամիտ ժամանակ՝ գործի նյութերին ծանոթանալու համար: Տեղեկացնենք, որ Քրեական օրենսգրքի 117 հոդվածի հիմքով (դիտավորությամբ մարմնական վնասվածք հասցնել) հարուցված քրեական գործը բաղկացած է 2 հատորից, 2-րդ հատորը 18 էջ է, 1-ինը՝ 200: Մեղադրանքը պաշտպանում է գլխավոր դատախազության ավագ դատախազ Հարություն Հարությունյանը: Դատավորը բավարարեց պաշտպանի միջնոդությունը եւ հաջորդ դատական նիստը նշանակեց սեպտեմբերի 13-ին: Նշենք նաեւ, որ այս գործով տուժողի աթոռն էր զբաղեցրել Կոտայքի մարզի դատախազ Մեսրոպ Մանրիկյանը: Ուշադրության է արժանի այն, որ արդեն 2-րդ դատական նիստն է, որ տեղի է ունենում դատարկ դահլիճում:
Ռուզան ՄԻՆԱՍՅԱՆ
