Ղահրիյանի հայտարարությունը
«Առավոտին» է դիմել ԱՆ «Կոշ» ՔԿՀ դատապարտյալ Սեյրան Ղահրիյանը եւ խնդրել, որպեսզի իր հայտարարությունը հրապարկվի: Նա սպառնում է ինքնասպանություն գործել: Դատապարտյալն իր հայտարարությունն ուղարկել է նաեւ ՀՀ նախագահ Սերժ Սարգսյանին:
Ստորեւ ներկայացնում ենք այն:
– Ես՝ ՀՀ արդարադատության նախարարության «Կոշ» քրեակատարողական հիմնարկի դատապարտյալ Սեյրան Աբգարի Ղահրիյանս, հանդես եմ գալիս հայտարարությամբ:
Կարդացեք նաև
Տառապում եմ ասթմա տեսակի անբուժելի հիվանդությամբ: Տեղից տեղ դժվարանում եմ տեղաշարժվել: Հիվանդությունս ձեռք եմ բերել քրեակատարողական հիմնարկում՝ հաճախակի հացադուլներ իրականացնելու հետեւանքով: Ու քանի որ հացադուլներս իրականացվում էին պատժախցերում, ուստի չկարողացա այդ հիվանդությունից խուսափել:
Մասնագիտությամբ պատմաբան, մանկավարժ եմ: Հանդիսանում եմ արցախյան պատերազմի ակտիվ մասնակից: Դրա վառ ապացույցն է այն, որ սույն թվականի մայիսի 9-ին ԼՂՀ պաշտպանության նախարար, գեներալ-լեյտենանտ Մ. Հակոբյանի կողմից արժանացել եմ շնորհակալագրի՝ հայրենիքիս հանդեպ իմ մատուցած ծառայությունների համար:
Հայտնեմ ավելին. 2000թ. Շենգավիթ համայնքի ընդհանուր իրավասության դատարանի դատավճռով սպանության մեղադրանքով դատապարտվել եմ 14 տարվա ազատազրկման, այնինչ ես ոչ մի սպանություն չեմ իրականացրել (կնոջ սպանություն- խմբ):
Շուրջ 12 տարի ես անօրեն ազատազրկված եմ:
Կարեւորում եմ ամենակարեւորի մասին:
Բերման ենթարկելու ժամանակ ինձ հետ էր իմ մանկահասակ երեխաս, որը 3 տարին դեռ չէր բոլորել:
Իրավապահ մարմիններն ինձ հայտնեցին, որ երեխայիս ուղարկում եւ տեղափոխում են Ղարաբաղ՝ իմ ընտանիքին: Մինչդեռ մանկահասակ երեխայիս նկատմամբ իրականացրին չարանենգ բռնություն: Հավելեմ, որ առանց նրա կամքը հարցնելու, մանկահասակ տղայիս տեղափոխեցին Վանաձորի մանկատուն, ու իմ կամքին հակառակ՝ որդեգրեցին:
Սակայն ես կասեի, որ մանկահասակ երեխայիս վաճառել են, քանի որ 12 տարի է, ինչ ես տեղյակ չեմ երեխայիս գտնվելու վայրի մասին:
Մեծարգո նախագահ:
Խնդրում եմ Ձեզ, որպեսզի Ձեր միջնորդությամբ համապատասխան մարմինները վերականգնեն իմ ոտնահարված ծնողական իրավունքները, այդ թվում ինձ եւ իմ ընտանիքին վերադարձվի երեխաս: Հակառակ դեպքում ես, անկասկած, առանց վարանելու, ի բողոք անարդարության, կիրականացնեմ ինքնասպանություն:
ՍԵՅՐԱՆ ՂԱՀՐԻՅԱՆ
դատապարտյալ
«Առավոտ» օրաթերթ
