Նոյեմբերի 14-15-ը ԱՄՆ-ի Սիլիկոնյան հովտի Սթենֆորդի համալսարանում տեղի կունենա «ԱրմՏեք 2012» հերթական եւ հոբելյանական համաժողովը: Այս մասին այսօր լրագրողների հետ հանդիպման ժամանակ հայտարարեց ՀՀ էկոնոմիկայի նախարար Տիգրան Դավթյանը: Նրա ներկայացմամբ` համաժողովի ընդհանուր ծախսերի ծավալը 150 հազար դոլար է, որից մոտ 17 հազար դոլարը պետությունը կվճարի, իսկ մնացածը` մասնավոր հատվածը եւ միջազգային կառույցները:
Նախարարի փոխանցմամբ` «ԱրմՏեք 2012»-ին կմասնակցեն արդյունաբերության, կրթական հաստատությունների ղեկավարներ, պետական գերատեսչությունների ներկայացուցիչներ, ընդ որում՝ այս անգամ համաժողովին կմասնակցեն Ավստրալիայի հայ համայնքի ՏՏ ոլորտի մասնագետներ, ինչպես նաեւ ԱՄՆ-ից, Լատինական Ամերիկայի, ԱՊՀ երկրների, Եվրոպայի եւ Ռուսաստանի ՏՏ ոլորտի ներկայացուցիչներ եւ գործարարներ:
Արդեն մեկ տասնյակ ընկերություններ համաժողովին մասնակցելու համար հայտ են ներկայացրել, եւ ինչպես նախարարն ասաց` հայտ ներկայացնողները ցանկություն են հայտնել մասնակցություն ունենալ նաեւ տեխնիկական, ֆինանսական եւ կազմակերպչական գործերում:
Կարդացեք նաև
Ասուլիսին ներկա «Ձեռնարկությունների ինկուբատոր հիմնադրամի» տնօրեն Բագրատ Ենգիբարյանի խոսքերով էլ`շատ քիչ երկրներ հնարավորություն ունեն Սիլիկոնյան հովտի Սթենֆորդի համալսարանում նման համաժողով անցկացնել: Պարոն Ենգիբարյանի ներկայացմամբ` այս համաժողովը հնարավորություն է ընձեռում համաշխարհային ճանաչում ունեցող երկրների հետ աշխատելու: Բագրատ Ենգիբարյանի խոսքերով` համաժողովում հնարավորություններ կստեղծվեն անհատների կամ թիմերի համար, եթե ցանկանան գործունեություն ծավալել Հայաստանում, նրանց կներկայացվի, թե ինչ աջակցություն կարող են ստանալ Հայաստանում:
Ի դեպ, ասուլիսի ժամանակ մի զավեշտալի դեպք տեղի ունեցավ: Լրագրողների հետ հանդիպման ժամանակ ներկա էր նաեւ «Վիասֆեր» տեխնոպարկի նախագահ Թոնի Մորոյանը, որն իր խոսքում էկոնոմիկայի նախարարին դիմեց որպես նախագահ եւ կատակեց` «Թերեւս նախագահ դառնաք»: Այս խոսքերը Տիգրան Դավթյանին այնքան շփոթեցրին, որ նա իր պաշտոնը հստակեցրեց, դեռ մի բան էլ` ինքնակամ իջեցրեց. «Հանձնաժողովի’ նախագահ»:
Նելլի ԲԱԲԱՅԱՆ
