Aravot.am-ը ԵՊՀ Հայ արվեստի պատմության եւ տեսության ՅՈՒՆԵՍԿՕ-ի ամբիոնի վարիչ, արվեստագիտության դոկտոր, պրոֆեսոր Լեւոն Չուգասզյանին խնդրեց մեկնաբանել ՀՀ գիտությունների ակադեմիայի քայլը. այն հայտնի պատճառներով կասեցրել է է իր փոխհարաբերությունները Հունգարիայի գիտությունների ակադեմիայի հետ, հայտարարելով. «Եվրոպական միության և ՆԱՏՕ-ի անդամ Հունգարիայի իշխանությունների` Ադրբեջանի իշխանությունների հետ կնքած խայտառակ, անպատիվ ու անհանդուրժելի գործարքը ցնցել ու խորապես վրդովել է գիտության հայ մշակներին` դրդելով ապաքաղաքական համարվող գիտնականներին ծայրահեղ ու աննախադեպ նմանօրինակ քայլի»:
Անվանի գիտնականը, սակայն դատապարտում է ՀՀ ԳԱԱ այս քայլը:
«Իմ կարծիքն այն է, որ պետք է կայուն համագործակցություն զարգացնենք զանազան երկրների գիտնականների հետ, մանավանդ այն երկրների, որտեղ ունեցել ենք գաղթօջախներ: Այդ երկրները դարեր շարունակ ապաստան են տվել օտարի լծի տակ հեծող հայրենիքից արտագաղթող մեր հայրենակիցներին և նրանք իրենց ավանդն են մուծել այդ երկրների կյանքում, տվյալ դեպքում նաև Հունգարիայում: Բազմաթիվ հունգարացիներ ջերմ զգացումներ ունեն մեր երկրի և ժողովրդի հանդեպ, ինչպես կարելի է սեպ խրել կամ անջրպետ գոյացնել բարեկամ ժողովուրդների մեջ »,-ասում է Չուգասզյանը:
Կարդացեք նաև
Նրա համոզմամբ. «Փոխանակ այս պահին Հունգարիայի կառավարության դեմ դնելու հայերի ավանդը այդ երկրում և կառավարողներին որակելու իբրև տգետ այս փաստերի հարցում ու եղբայր ժողովուրդների թշնամացնող, մեր ակադեմիան իրեն դրսևորում է իբրև հայ ժողովրդի պատմությանն անտեղյակ և ազգային անհեռատես քաղաքականություն իրականացնող մի հակագիտական հիմնարկ: Սա գալիս է նրանից, որ մեր ակադեմիայի ղեկավարության մեջ հայտնվել են հայագիտության հարցում ոչ բավարար պատրաստվածություն ունեցող անձինք: Չի կարելի րոպեի ազդեցության տակ ընդունել տաքգլուխ, անլուրջ որոշումներ և խաղալ գիտությունների ազգային ակադեմիայի հեղինակության հետ: Այդ որոշումը չի կարող արտահայտել Հայաստանի գիտնականների միահամուռ կարծիքը եւ դառնալ նրանց բոլորի որոշումը:Դա ակադեմիայի ղեկավարության մեջ սողոսկած անարժան մարդկանց ոչ բավարար հայագիտական պատրաստվածության ու քաղաքական մտածողության մակարդակն է արտահայտում»:
Գոհար ՀԱԿՈԲՅԱՆ
