Այսօր «Հայելի» ակումբում տեղի ունեցավ «Մաշտոց 1650» խորագիրը կրող ցուցահանդեսին նվիրված ասուլիս: Արվեստի խաչմերուկում կհանդիպեն գեղանկարիչ Աշոտ Ավագյանը, երաժիշտ Վահան Արծրունին, կատարող Հասմիկ Բաղդասարյանը և կցուցադրվի Հակոբ Հովհաննիսյանի լուսանկարչական տեսաֆիլմը: Ցուցահանդեսը տեղի կունենա սեպտեմբերի 4 –ին՝ Աբրահամյան արվեստի կենտրոնում:
Վահան Արծրունին « Մաշտոցն ու Սրբազան Մարգարիտները» շարականների շարքի մեկնաբանությամբ է սկսելու ցուցահանդեսի բացումը. «Գաղափարը հետևյալն է՝ Մաշտոցը թանգարանային նմուշ չէ, այլ աշխատուն գործոն, նա իր արդի արտահայտումը ունի նկարչության մեջ: Նրա ժառանգությունը կա, նա ոչ միայն տառերի գյուտի հեղինակն է, այլ նաև մասնագիտական երաժշտության, շարականների, որոնք հիմք դարձան պատարագների հնչեցման ժամանակ»:
Երաժշտի խոսքով՝ սկսած աշխատանքը միայն նեղ մասնագիտական չէ, այլ ներառում է արվեստի բոլոր շրջանակները: Հեռուստատեսությունները ցուցադրում են շարականները, սակայն ինչ վերաբերում է մասսայականացմանը, դրա խնդիրը, իրոք, կա, կապը հանդիսատեսի հետ երբեմն չի աշխատում:
Գեղանկարիչ Աշոտ Ավագյանը հանդես կգա «Մաշտոցն ու իր աշխատանքները» գեղանկարչական ստեղծագործություններով. «Այս ամենը նորություն չէ, նորություն՝ որպես այդպիսին, տիեզերքում չի լինում: Վահանը սկսեց մշակումները, խոսակցություն եղավ և ինձ առաջարկեցին իմ նկարները ցուցադրել, դրանք հիմնականում Մաշտոցի ու նրա աշակերտների պատկերներով են և անձնավորված: Լինելով աշակերտներ՝ որոշեցինք մեր տուրքը տալ ուսուցիչ – հանճարին»:
Նկարիչը հավելեց, որ նաև լինելու է վիդեոարտ, երաժշտություն, լուսանկարչական տեսաֆիլմ:
Աբրահամյան արվեստի կենտրոնի տնօրեն Զաբել Բերբերյանի կարծիքով՝ վերնիսաժային արվեստին չպետք է նմանվել,անհրաժեշտ է նոր շունչ մտցնել, նորը քաջալերել, ժամանակակցի հետ քայլել: «Հայաստանը իր մշակութային դեմքով ուժեղ է, մեր օրերում անմակարդակ բաները շատ են, դրանց տեղի են տրվում, բայց պետք չէ: Այսօրվա մշակույթի ծառայողները Մաշտոցի աշակերտներն են:
Անժելա ՇԱՀՈՒՄՅԱՆ
